თორნიკე ოქრიაშვილი ისევ დაშავდა

საქართველოს ეროვნული ნაკრებისა და “კრასნოდარის” ნახევარმცველი თორნიკე ოქრიაშვილი, რომელსაც ტრავმა ახალი მოშუშებული ჰქონდა, ისევ დაშავდა. რუსეთის ჩემპიონატის მე-12 ტურში ტულის “არსენალის” წინააღმდეგ გამართული შეხვედრის (0:1) 79-ე წუთზე ქართველმა ფეხბურთელმა ტრავმა მიიღო და თამაშის გაგრძელება ვეღარ შეძლო, თუმცა ამ დროისთვის კრასნოდარელებს სამივე ცვლილება ჰქონდათ განხორციელებული. მატჩის 56-ე წუთიდან “კრასნოდარი” რიცხობრივ უმცირესობაში იყო, ვინაიდან შარლ კაბორემ მეტოქის წინააღმდეგ იუხეშა და პირდაპირ წითელი ბარათით დაისაჯა. შესაბამისად, ოქრიაშვილის გუნდმა თამაში ცხრა ფეხბურთელით ჩაამთავრა. აღსანიშნავია, რომ ქართველი ფეხბურთელი მოედანზე ცხრა წუთის გასული იყო, როდესაც ტრავმა მიიღო.

ჯერჯერობით უცნობია, შეძლებს თუ არა ოქრიაშვილი 2018 წლის მსოფლიოს ჩემპიონატის საკვალიფიკაციო ეტაპზე უელსისა და სერბეთის ნაკრებების წინააღმდეგ გასამართ მატჩებში მონაწილეობის მიღებას.

შეგახსენებთ, რომ თორნიკე ოქრიაშვილმა 13 მარტს ჯვარედინი მყესები გაიწყვიტა, რის გამოც დაახლოებით ნახევარი წლით მოუწია უქმობა.