“რუსთავი” ეროვნულ ლიგაში ითამაშებს!

გუშინ ეროვნული ლიგა 1-ის 35-ე ტურის მატჩები გაიმართა.

ერთ-ერთ შეხვედრაში “რუსთავმა” “ფოლადზე” “ვიტ ჯორჯია” მიიღო. დაძაბული დაპირისპირება მასპინძელთა უპირატესობით წარიმართა. მე-20 წუთზე დათა სიჭინავამ ანგარიში გახსნა. პირველ ნახევარში გოლი აღარ გასულა. მეორე ტაიმში, 61-ე წუთზე ზაზა ციცქიშვილმა მეორეც გაუტანა სტუმრებს. ამის შემდეგ, რუსთაველებს კიდევ ჰქონდათ მომენტები, თუმცა არცერთი გუნდის კარის ბადე აღარ შერხეულა.

საბოლოოდ, “რუსთავმა” ანგარიშით, 2-0 იმარჯვა. მან 83 ქულას მოუყარა თავი, ბოლო ტურის წინ ექვსი ქულით გაასწრო მეორეადგილოსან მარტვილის “მერანს” და, შესაბამისად, ეროვნულ ლიგაში თამაშიც გაინაღდა!