სქოულზი: “მანჩესტერ იუნაიტედში” მწვრთნელად მუშაობა მინდოდა, მაგრამ უარი მითხრეს”

“მანჩესტერ იუნაიტედის” ყოფილი ნახევარმცველი პოლ სქოულზი ჟურნალისტებთან საუბრისას გამოტყდა, რომ “წითელი ეშმაკების” 23-წლამდელთა გუნდის თავკაცად მუშაობა სურდა, მაგრამ კლუბის ხელმძღვანელობამ მას უარი უთხრა.

“შესაძლოა, უარი იმიტომ მითხრეს, რომ გუნდს ტელეთერის მეშვეობით ვაკრიტიკებდი, მაგრამ მაშინ მე “მანჩესტერ იუნაიტედის” თამაშს სამართლიანად ვაფასებდი. ამ გუნდში ოცი წელი გავატარე, ცხოვრების საუკეთესო წლები შევწირე და ვერავინ იტყვის, რომ განზრახ ვაკრიტიკებდი.

“მანჩესტერ იუნაიტედი” ერთადერთი კლუბია, სადაც ვიმუშავებდი და მეგონა, რომ ახალგაზრდული გუნდის ჩაბარების შესაძლებლობას მომცემდნენ. ამ პოსტის ჩაბარება მართლაც მინდოდა, მაგრამ არ გამოვიდა”, – ციტირებს სქოულზის სიტყვებს “სანი”.