სოლომონ კვირკველიას “ლოკომოტივი” ევროპა ლიგის 1/8-ფინალშია! (ვიდეო)
მოსკოვის “ლოკომოტივმა”, რომლის რიგებშიც სოლომონ კვირკველია ასპარეზობს, საკუთარ სტადიონზე ფრანგული “ნიცა” დაამარცხა და ევროპა ლიგის 1/8-ფინალური ეტაპის საგზური მოიპოვა. ამ დიდ წარმატებაში თავისი წვლილი შეიტანა მოსკოველთა ქართველმა ლეგიონერმაც.
როგორც იცით, ნიცაში გამართული პირველი მატჩი რუსების გამარჯვებით დასრულდა, ანგარიშით 2-3. “ნიცა” მოსკოვში გამარჯვებისთვის ჩამოვიდა და აქტიურადაც ცდილობდა წადილის მიღწევას, მაგრამ ამაოდ – მატჩი კვლავ “ლოკომოტივის” გამარჯვებით, 1-0 დასრულდა.
აღსანიშნავია, რომ მთელი მატჩის მიმდინარეობისას, სტუმრები დომინირებდნენ. “ნიცას” ბურთის ფლობის პროცენტული მაჩვენებელი 63 პროცენტი გახლდათ, ფრანგებმა 19-ჯერ დაარტყა კარის მიმართულებით.
სასიამოვნოა, რომ მოსკოველთა დაცვის ხაზმა (სოლომონ კვირკველიას მეთაურობით) წარმატებით გააართვა დაკისრებულ მოვალეობას და გოლი არ გაუშვა. ქართველმა ორივე მატჩში შეუცვლელად ითამაშა.
