“სამგურალის“ ახალი მთავარი მწვრთნელი ბესიკ ხაჭიპერიძეა

საფეხბურთო კლუბი წყალტუბოს ,,სამგურალი“ ურთიერთშეთანხმების საფუძველზე გუნდის მთავარმა მწვრთნელმა გია გიგატაძემ დატოვა. გამოცდილმა სპეციალისტმა გუნდიდან წასვლის გადაწყვეტილება გასულ ტურში ,,ნორჩ დინამოსთან“ მარცხის შემდეგ მიიღო.

,,სამგურალის“ მთავარი მწვრთნელის პოსტზე მას 33 წლის სპეციალისტი ბესიკ ხაჭიპერიძე შეცვლის, რომელიც ,,სამგურალში“ აქამდე გიგატაძის ასისტენტად მუშაობდა.

,,სამგურალი“ მადლობას უხდის გია გიგატაძეს გაწეული სამსახურისთვის და წარმატებებს უსურვებს სამწვრთნელო კარიერაში.

სამწვრთნელო შტაბში განხორციელებული ცვლილებების შესახებ კომენტარი გუნდის დირექტორმა ამირან ვარდანიძემ გააკეთა:
,,გია გიგატაძეს ,,სამგურალის“ მიმართ დიდი დამსახურება აქვს. ჩვენს გუნდში 1998 წელს მთავარი მწვრთნელის ასისტენტად დაიწყო მუშაობა. 2000 წლიდან დაინიშნა მთავარ მწვრთნელად. მუშაობის პერიოდში გუნდი ორჯერ გადაიყვანა უმაღლეს ლიგაში. 2003–2004 წლების სეზონში შეუძლებელი შეძლო და ფინანსური კრიზისის მიუხედავად გუნდს უმაღლესის საგზური მოუპოვა. სამწუხაროდ, მაშინ უსახსრობის გამო ,,სამგურალმა“ უმაღლეს ლიგაში ადგილი ,,ზესტაფონს“ დაუთმო. წლების განმავლობაში მუშაობდა ქუთაისის ,,ტორპედოში“, გორის ,,დილასა“ და ტყიბულის ,,მეშახტეში“. 2016 წელს წყალტუბოს ,,სამგურალის“ მთავარ მწვრთნელად დაბრუნდა და გუნდს ეროვნული ლიგა 2–ის საგზური მოუპოვა. გასულ სეზონში კი მისი გაწვრთნილი გუნდი მე–4 ადგილზე გავიდა და პლეი ოფში გასვლამდე ცოტა დააკლდა. სამწუხაროდ, მიმდინარე ჩემპიონატში ,,სამგურალს“ თამაშები არ წაუვიდა და გია გიგატაძემ თავად მიიღო გუნდიდან წასვლის გადაწყვეტილება. მადლობას ვუხდით მას გაწეული სამსახურისთვის და გვჯერა, რომ სამწვრთნელო კარიერაში კიდევ არაერთ წარმატებას მიაღწევს.

რაც შეეხება გუნდის ახალ მთავარ მწვრთნელს, ამ საპასუხისმგებლო პოზიციაზე ახალგაზრდა მწვრთნელი ბესიკ ხაჭიპერაძე დავნიშნეთ. ხაჭიპერაძემ საფეხბურთო კარიერა ,,სამგურალში“ დაასრულა. იყო ,,სამგურალი 2“–ის მთავარი მწვრთნელი, შემდეგ მუშაობდა ,,სამგურალის“ მთავარი მწვრთნელის ასისტენტად. საქართველოს ფეხბურთის განვითარების ფონდის ხელშეწყობით კლუბმა მის საწვრთნელო განათლებაში ჩადო ინვესტიცია და წარმატებით გაიარა ა ლიცენზიის კურსები. ბესიკ ხაჭიპერაძემ ამ წლებში დიდი გამოცდილება დააგროვა, ახალგაზრდა, ენერგიული ადამიანია და იმედი გვაქვს რომ გუნდის კრიზისიდან გამოყვანას შეძლებს. მართალია, ,,სამგურალი“ რთულ მდგომარეობაშია, მაგრამ მგდომარეობა საგანგაშო არ არის და იმედი გვაქვს, რომ გულშემატკივრების გვერდში დგომით და ერთსულოვნებით შევძლებთ მდგომარეობის გამოსწორებას.