რატომ დაარტყა პოგბამ პენალტი “ლესტერთან” მატჩში?

“მანჩესტერ იუნაიტედის” ნახევარმცველმა, პოლ პოგბამ “ლესტერთან” გამართული მატჩის შემდეგ მის მიერ შესრულებულ თერთმეტმეტრიანზე კომენტარი გააკეთა.

შეხვედრაში ანგარიში ფრანგმა ნახევარმცველმა გახსნა – მან მე-3 წუთზე პენალტი ზუსტად შეასრულა. ბოლო პერიოდში, “იუნაიტედში” თერთმეტმეტრიანებს ალექსის სანჩესი ურტყამდა და ბევრი ელოდა, რომ “ლესტერთან” მატჩშიც ბურთი მას დარჩებოდა.

“რეალურად, გუნდში პენალტების ერთი შემსრულებელი არ გვყავს. მწვრთნელმა რომ ერთი ფეხბურთელი დაასახელოს, ყველაფერი იმაზეა დამოკიდებული, თუ როგორ მდგომარეობაში ვართ კონკრეტულ მომენტში. გადავწყვიტე, მე დამერტყა. მეც ერთ-ერთი მათგანი ვარ, ვისაც თერთმეტმეტრიანის შესრულება შეუძლია. შესაძლოა, მომდევნო ჯერზე ბურთი ალექსისს დავუთმო, ეს პრობლემას არ წარმოადგენს”, – ციტირებს პოგბას სიტყვებს Squawka.