“ბარსელონამ” მადრიდის “რეალი” შეარცხვინა (ვიდეო)

28 ოქტომბერს “კამპ ნოუმ” სეზონის ერთ-ერთ უმნიშვნელოვანეს დაპირისპირებას უმასპინძლა. მართალია, “ელ კლასიკოს” ის ელფერი აკლდა, რომელსაც კრიშტიანუ რონალდუსა და ლეო მესის მოქიშპეობა სძენდა, თუმცა შეხვედრა არანაკლებ საინტერესო გამოდგა.

საინტერესოსა და დაძაბულს ნამდვილად ვერ ვუწოდებთ შეხვედრის პირველ ნახევარს, რომელიც სრულად “ლურჯ-ბროწეულისფერთა” უპირატესობით მიმდინარეობდა. მეთერთმეტე წუთზე ხორდი ალბას ბრწყინვალ გადაცემას ფილიპე კოუტინიო გამოეხმაურა და ანგარიში გახსნა 1-0. სწორედ მარცხენა ფლანგელის კარგ თამაშს მოჰყვა მეორე გოლიც, რომელიც ლუის სუარესმა მოპოვა და გარდასახა კიდეც თერთმეტმეტრიანიდან. მადრიდელებს საპასუხოდ ღირებული არაფერი შეუქმნიათ თუ არ ჩავთვლით შორეულ გასროლებს.

მეორე ნახევრის პირველი წუთები რადიკალურად განსხვავებული სცენარით ვითარდებოდა. გულშემატკივარმა სწორედ ის ბრძოლა იხილა, რის გამოც ყველას ასე უყვარს “ელ კლასიკო”. 50-ე წუთზე მარსელომ ერთი ბურთი გაქვითა, ხუთიოდ წუთში კი მოდრიჩს გათანაბრების ბრწყინვალე შანსი მიეცა, თუმცაღა ძელს მოარტყა ბურთი.

მესამოცე წუთიდან მოყოლებული “ბარსელონამ” ისევ აღიდგინა ძალები. სწორედ 60′-ე წუთზე მოარტყა ბურთი ძელს სუარესმა. 75-ე წუთზე სუარესმა დუბლი გაიფორმა, 83-ე წუთზე – ჰეთ-ტრიკი. 87-ე წუთზე კი “რეალის” განადგურებას წერტილი არტურო ვიდალმა დაუსვა.