ჯენარო გატუზო: “ისტორიულ კლუბს ვარცხვენთ”

ჯენარო გატუზომ “ტორინოსთან” განცდილი მარცხის (2-0) შემდეგ თავის გუნდს სამარცხვინო უწოდა. “მილანი” სერია A-ს დასრულებამდე 4 ტურით ადრე მეექვსე პოზიციას იკავებს და სულ რაღაც ორი ქულით ჩამორჩება ჩემპიონთა ლიგის ზონაში მყოფ “რომას”.

“სიმართლე ისაა, რომ თამაშით ნაკლებ სიამოვნებას ვიღებთ, ვიდრე ეს ორი თვის წინ იყო. ეფექტიანობა დავკარგეთ, ძალიან ბევრს ვფიქრობთ და საჭირო მომენტში ეს ენთუზიაზმის ნაკლებობასაც იწვევს.

ამიტომაც ვამბობდი, რომ არ შემიძლია ფეხბურთელების თავში შევძვრე და ისე განვაწყო ისინი, როგორც მინდა. შედეგებზე ვარ დამოკიდებული, პასუხისმგებლობა გამაჩნია.

თავდაჯერებულობა გვაკლია, ისევე როგორც სიმშვიდე. ასეთი შედეგებით არა მხოლოდ ჩვენ გუნდს, არამედ ისტორიულ კლუბს ვარცხვენთ,” – აცხადებს ჯენარო გატუზო.