“მანჩესტერ სიტიმ” ვინსენ კომპანის საოცარი გოლით “ლესტერი” დაამარცხა (ვიდეო)
პრემიერ ლიგის 37-ე ტური “მანჩესტერ სიტისა” და “ლესტერ სიტის” უმნიშვნელოვანესმა დაპირისპირებამ დახურა. შეხვედრა ძალიან დაძაბული და საინტერესო გამოდგა და მისი ბედი ვინსენ კომპანის ულამაზესმა გოლმა გადაწყვიტა.
შეხვედრა “მანჩესტერ სიტის” ტოტალური უპირატესობით მიმდინარეობდა, თუმცა “ქალაქელები” მომენტების დაგვირგვინებას ვერ ახერხებდნენ, რაც “მელიების” მცველების დამსახურებაც გახლავთ.
70-ე წუთამდე ყველაფერი “ლივერპულის” წისქვილზე ასხამდა წყალს, თუმცა ვინსენ კომპანიმ ყველაფერი საკუთარ თავზე აიღო და უძლიერესი დარტყმით შეძლო უდიდესი მნიშვნელობის მქონე გოლის გატანა. მატჩის მიწურულს ედერსონის კარის აღების შანსი “სიტის” ყოფილ ფეხბურთელ იჰეანაჩოს მიეცა, თუმცა ამ უკანასკნელმა დიდი მანძილით ააცილა.
ასე რომ, პრემიერ ლიგის ჩემპიონის ვინაობას ბოლო ტური გადაწყვეტს – ორქულიანი უპირატესობის მქონე “მანჩესტერ სიტი” აწ უკვე უამბიციო “ბრაიტონს” ეწვევა, “ლივერპული” კი შინ საკმაოდ ძლიერ “ვულვერჰემპტონს” შეერკინება.
