მარსელო ბიელსა: “ჩემთვის გვარდიოლას ტაქტიკები დიდ საიდუმლოებას წარმოადგენს”
მარსელო ბიელსა პრესასთან საუბრისას აღიარებს, რომ მისთვის საიდუმლოდ რჩება, თუ როგორ ახერხებს პეპ გვარდიოლას “მანჩესტერ სიტის” პრემიერ ლიგაში დომინირებას.
“პეპ გვარდიოლას ნიჭიერებას ვაღიარებ და დიდ პატივსაც ვცემ, რადგანაც ის გუნდს ისეთი სტილის ფეხბურთს ათამაშებს, რომლის კოპირებაც უბრალოდ შეუძლებელია.
ყოველთვის ისმოდა კითხვა – “რას იზამდა გვარდიოლა იმ იმ ფეხბურთელების გარეშე, რომლებიც “ბარსელონასი” ჰყავდა?”. შეგვიძლია ვთქვათ, რომ “ბარსელონას” ფეხბურთელები უნიკალურები იყვნენ, თუმცა ფაქტია, რომ პეპის “ბაეირნი” და “მანჩესტერ სიტი” უმაღლესი დონის ფეხბურთს თამაშობდნენ.
რეალობა ის გახლავთ, რომ გვარდიოლას მიერ დანერგილი თამაშის სტილი გაცილებით უფრო მეტად ფასობს, ვიდრე ის ფეხბურთელები, რომლებიც ადრე ჰყავდა.
როდესაც მათ თამაშებს ვუყურებ, თავს უცოდინრად ვგრძნობ. ვხედავთ სურათს, სადაც ათი ფეხბურთელი საკუთარ საჯარიმოსთანაა განლაგებული და “სიტი” ბურთს აკონტროლებს. ვხვდებით, რომ ეს კარგია, თუმცა ამის გამეორება შეუძლებელია.
ბევრს ვფიქრობ ხოლმე, მინდა ვიცოდე, რაშია საიდუმლო, თუმცა ჩემთვის გვარდიოლას ტაქტიკები დიდ საიდუმლოებად რჩებიან,” – აცხადებს ბიელსა.
