ბართომეუ: “ლა ლიგის მოგება დიდი მიღწევაა, თუმცა მის დაკნინებას ცდილობენ”
კატალონიის “ბარსელონამ” მიმდინარე სეზონში ესპანეთის ჩემპიონატისა და სამეფო თასის ტიტულების მოგება შეძლო, თუმცაღა ბევრი “ლურჯ-ბროწეულისფერთა” სეზონს წარმატებულად მაინც არ თვლის, არგუმენტად კი ჩემპიონთა ლიგაზე განცდილი კრახი მოყავთ.
კლუბის პრეზიდენტმა პრესასთან საუბრისას აღნიშნა, რომ გუნდის შედეგებით კმაყოფილია, მიუხედავად იმისა, თუ რას ამბობს ხალხი: “ლა ლიგა კიდევ ერთხელ მოვიგეთ, თანაც დიდი სხვაობით. დასრულებამდე სამი ტურით ადრე მეორე ადგილზე მყოფ გუნდს 11 ქულით ვუსწრებდით, მესამეადგილოსანდ კი – 19 ქულით.
ლიგის მოგება ძალიან დიდი მიღწევაა, დიდებული რამ, თუმცა ბევრი ამის დაკნინებას ცდილობს. ყველას შეუძლია თავისი აზრი გამოხატოს, თუმცა ფაქტია, რომ ლა ლიგის მოგება დიდებულია.
მესმის, რომ ფანების დიდი ნაწილი უკმაყოფილობას გრძნობს, რადგანაც მოგებებს ვართ მიჩვეულნი და გვინდოდა, რომ ჩემპიონთა ლიგაც მოგვეგო, თუმცა ასე არ მოხდა.
გუნდის შედეგებით კმაყოფილი ვარ და ვამაყობ მათი შედეგებით,” – აცხადებს ბართომეუ.
