რივალდო კოუტინიოს წარუმატებლობაში მესის ადანაშაულებს
“ბარსელონას” ლეგენდა და ოქროს ბურთის მფლობელი რივალდო ფილიპე კოუტინიოს “ბაიერნში” ტრანსფერს გამოეხმაურა. შეგახსენებთ, რომ “ბლაუგრანას” 140-მილიონიანი შენაძენი ერთწლიანი არენდით “ბავარიაში” მოსინჯავს ძალებს.
“ყოველთვის მჯეროდა, რომ ფილიპე კოუტინიოს “ბარსელონაში” დიდი წარმატებების მიღწევა შეეძლო, მაგრამ მოვლენები ისე არ განვითარდა, როგორც ველოდით. ადაპტაციის პერიოდმა უფრო დიდი დრო წაიღო და მან “ბაიერნში” გადასვლის გადაწყვეტილება მიიღო.
ცოტათი იმედგაცრუებული ვარ ამ შედეგით. სამწუხაროა, რომ კოუტინიომ ძირითადში ადგილის დამკვიდრება ვერ შეძლო. ამის გამო ის თვითდაჯერებულობას დღითი დღე კარგავდა. ახლა ის კიდევ ერთ დიდ კლუბში ითამაშებს, რათა ძველი ფორმა აღიდგინოს.
ადვილი არასოდესაა ადგილი დაიმკვიდრო იმ გუნდში, სადაც ლეო მესი მუდმივად ყველანაირ პასუხისმგებლობასა და ქება-დიდებას იღებს. მსოფლიოში ეს რამდენიმე ფეხბურთელს შეუძლია. გამოდის, რომ კოუტინიო მათ შორის არაა.
არგენტინელი ვარსკვლავი გუნდის ლიდერია და ამ დონეზე თამაშს კიდევ 3-4 წლის მანძილზე გააგრძელებს. ასე რომ, რთულია სხვა ფეხბურთელმა გაიბრწყინოს “ბარსელონაში” – ვციტირებთ რივალდოს სიტყვებს.
