ბექა გორგაძე: “მომდევნო მატჩებისათვის ბევრი სამუშაო გვაქვს”
საქართველოს მორაგბეთა ნაკრების წევრმა, ბექა გორგაძემ უელსთან გამართული შეხვედრა შეაფასა.
“ბორჯღალოსანთა” მესამე ხაზელი უელსთან დაფიქსირებულ ანგარიშს (43:14) სამწუხაროდ მიიჩნევს და ამბობს, რომ გუნდს მომდევნო მატჩებისათვის ბევრი სამუშაო აქვს.
“ჩვენ ბოლომდე ვიბრძოლეთ, მაგრამ ეს საკმარისი არ აღმოჩნდა. პირველი ტაიმი ჩვენთვის ძალიან რთული გამოდგა, რადგან მეტოქეს ბევრი ქულის აღების საშუალება მივეცით, ჩვენ კი ქულების მოპოვება დავაგვიანეთ. ანგარიში სამწუხაროა. მომდევნო მატჩებისათვის ბევრი სამუშაო გვაქვს. შევეცდებით, რაც შეიძლება მეტი კომპონენტი გავაუმჯობესოთ.
შესვენებაზე, გასახდელში ვთქვით, რომ დასაკარგი არაფერი გვქონდა და მეორე ნახევრის პირველივე წუთებში ძალიან მოვინდომეთ. ძალიან კარგია, რომ ორი ლელოს გატანა შევძელით. მომდევნო შეხვედრებში რაც შეიძლება მეტი ლელო უნდა გავიტანოთ”, – განაცხადა გორგაძემ.
