რატომ გამოტოვა გიორგი ჭანტურიამ 1 წელი?
საქართველოს ეროვნული ნაკრებისა და კატალონიის “ბარსელონას” ყოფილი ფეხბურთელი გიორგი ჭანტურია თბილისის “საბურთალოში” დაბრუნდა, სადაც პირველად დაიწყო თამაში.
ჭანტურია წელიწადი და 2 თვის შემდეგ დაუბრუნდა ფეხბურთს და “საბურთალოში” გადასვლაში გია ცეცაძემ დაარწმუნა.
როგორც ფეხბურთელმა პრესკონფერენციაზე აღნიშნა, 1 წელი მუხლზე 2 ოპერაციისა და რამდენიმე აგენტის დაუდევრობის გამო გაუცდა. 2019 წლის ზაფხულში გიორგი თურქეთში, “ჰათაისფორში” ვარჯიშობდა და ამხანაგურ მატჩშიც მიიღო მონაწილეობა, მაგრამ თურქეთში არ დარჩა. არ გამოვიდა მისი ტრანსფერი ამერიკაშიც, სადაც ვაკო ყაზაიშვილი და გურამ კაშია აგორებენ ბურთს.
საბოლოო ჯამში, ჭანტურია კვლავ “საბურთალოსთვის” გაიტანს, საიდანც ჯერ კატალონიის “ბარსელონაში”, შემდეგ კი არნემის “ვიტესში” მოხვდა. იქნება “ერთიუბანი” კვლავ სატრამპლინო ხიდი მოთამაშის კარიერაში?
