დელე ალიმ კორონავირუსზე ხუმრობისთვის ბოდიში მოიხადა

ლონდონის “ტოტენჰემისა” და ინგლისის საფეხბურთო ნაკრების წევრმა, დელე ალიმ, კორონავირუსზე ხუმრობისთვის ბოდიში საჯაროდ მოიხადა. სოციალურ ქსელში გავრცელებულ ვიდეოში ალიმ აზიელი მამაკაცი გამოაჩინა და შემდეგ განაცხადა: “ვირუსი უფრო სწრაფი უნდა იყოს, თუ უნდა, რომ დამიჭიროს.”

ვიდეო მალევე გავრცელდა აზიურ სოციალურ პლატფორმებზე, რის გამოც ალი იძულებული გახდა წაეშალა და ბოდიშის წერილი საჯაროდ გამოექვეყნებინა.

“ბოდიშს ვიხდი სნაპჩატზე გუშინ განთავსებული ვიდეოს გამო. ეს სასაცილო ნამდვილად არ ყოფილა. მალევე გავაანალიზე ყოველივე ეს და ვიდეოც წავშალე. ჩემ თავს და კლუბს იმედები გავუცრუე.

არ მინდა ხალხს ჩემზე ცუდი შთაბეჭდილება შეექმნას. ეს თემა სახუმარო არ არის. დიდ სიყვარულს ვუგზავნი ყველას,” – ვკითხულობთ ალის განცხადებაში.