პიკე: “ბარსელონა” ფავორიტი არაა, არასოდეს დაგვავიწყდება “ლივერპული” და “რომა”

კატალონიის “ბარსელონას” მცველმა ჟერარ პიკემ “ნაპოლისთან” ჩემპიონთა ლიგაზე გასამართ მატჩამდე პრესკონფერენციაზე ჟურნალისტების კითხვებს უპასუხა.

“გასულ წლებში ჩვენ ჩემპიონთა ლიგის ამ ეტაპზე ჩემპიონობის ერთ-ერთ ფავორიტებად მოგვიაზრებდნენ. წელს განსხვავებული სიტუაციაა – “ბარსელონა” ფავორიტი არაა.

ჩვენ ყველაფერს ნაბიჯ-ნაბიჯ გავაკეთებთ. ამჯერად მხოლოდ “ნაპოლიზე” ვართ კონცენტრირებულები, თუ შემდეგ ეტაპზე გავალთ, ფიქრს გავაგრძელებთ. წარსულში ბევრი მაგალითი გვაქვს, როდესაც ჩემპიონობაზე ვფიქრობდით და იმედები გაგვიცრუვდა.

არასოდეს დაგვავიწყდება “ლივერპულთან” და “რომასთან” გამართული მატჩები. ეს ორი ყველაზე მტკივნეული მარცხი იყო ჩვენ ისტორიაში, ჩვენი ფეხბურთელების კარიერაში. გაკვეთილი ვისწავლეთ და ვეცდებით, რომ იგივე შეცდომები აღარ გავიმეოროთ, – აცხადებს პიკე.