რატომ არ ითამაშებს “რეალი” “სანტიაგო ბერნაბეუზე”?

პანდემიის პერიოდში ესპანეთის ჩემპიონატის ეგიდით პირველი მატჩი უკვე შედგა (“სევილია” 2:0 “ბეტისი”). მალე საქმეში გათამაშების მთავარი ფავორიტებიც ჩაერთვებიან “რეალისა” და “ბარსელონას” სახით.

მადრიდულ გრანდს სრულად განსხვავებულ გარემოში მოუწევს სეზონის გაგრძელება – ხელმძღვანელების გადაწყვეტილებით “ბლანკოსი” “სანტიაგო ბერნაბეუზე” აღარ ითამაშებს.

საქმე ის გახლავთ, რომ მადრიდული გრანდი 2022 წლის ზაფხულში სარესტავრაციო სამუშაოების წარმოებას გეგმავდა. სამთვიანმა პაუზამ და პანდემიის პირობებმა ხელმძღვანელებს საშუალება მისცა, რომ ეს პროცესი ნაადრევად წამოეწყოთ.

ასე რომ, კვირას “რეალი” “ეიბარს” “ალფრედო დი სტეფანოს” სტადიონზე მიიღებს, რომელიც 6 000 გულშემატკივარზეა გათვლილი (“ბერნაბეუ” 81 000 გულშემატკივარს იტევს).