ბერბატოვი: “ჰავერცმა “რეალში” გადასვლა არც უნდა გაიფიქროს”
კაი ჰავერცისთვის მიმდინარე სეზონი ნამდვილი ტრამპლინი აღმოჩნდა. ფეხბურთლის ტრანსფერით ევროპული ფეხბურთის ჰეგემონები ინტერესდებიან. თუმცა, დიმიტარ ბერბატოვის აზრით, ეს უკანასკნელი ჯერჯერობით გერმანიაში უნდა დარჩეს.
“კაი ჰავერცმა ბოლო დროს ძალიან ბევრი გრანდის ყურადღება მიიპყრო. მათ შორის მადრიდის “რეალიც” არის. ჩემი გადმოსახედიდან, ჰავერცმა “რეალში” გადასვლა არც უნდა გაიფიქროს.
მენტალურად მზად თუ არ ხარ, “რეალში” ტრანსფერი, შესაძლოა, უდიდესი შეცდომა გამოდგეს. დააკვირდით ლუკა იოვიჩსა და ედენ აზარს. კურტუასაც აკრიტიკებდნენ, ბეილს კვლავაც უსტვენენ. დაუჯერებელია, მაგრამ რონალდუსაც კი უწყობდნენ ობსტრუქციებს.
რა თქმა უნდა, მაცდური წინადადებაა, თუმცა სანამ “ბერნაბეუზე” გადახვალ უნდა დარწმუნდე, რომ ყველანაირად მზად ხარ. ჰავერცი ჯერ კიდევ ძალიან ახალგაზრდაა და “ლევერკუზენში” თუ დარჩება, ეს საუკეთესო ვარიანტი იქნება მისი განვითარებისთვის.
ბუნდესლიგაში დარჩენით ის არაფერს დაკარგავს – რეგულარულად თამაშობს და საკმაოდ კონკურენტუნარიან კლუბშიც ირიცხება. “ლევერკუზენში” ყველაფერს აკეთებენ ფეხბურთელების განსავითარებლად,” – აცხადებს ბერბატოვი.
