“რეალმა” “სოსიედადი” დაამარცხა და სატურნირო ცხრილში გალიდერდა (ვიდეო)

22 ივნისს ესპანეთის ჩემპიონატის 30-ე ტურის შეხვედრაში “რეალ სოსიედადი” დაძაბულ ბრძოლაში დამარცხდა ჩემპიონობისთვის მებრძოლ მადრიდის “რეალთან”.

შეხვედრის პირველ ნახევარს დაზვერვითი ხასიათი ჰქონდა და საგოლე მომენტებითაც არ გამოირჩა. უპირატესობას სტუმარი გუნდის ფეხბურთელები ფლობდნენ, თუმცა საფრთხეები კურტუას საჯარიმოსთანაც იქმნებოდა.

ანგარიში მატჩის 50-ე წუთზე სერხიო რამოსმა გახსნა თერთმეტმეტრიანიდან, რომელიც ვინისიუს ჟუნიორმა მოიპოვა. 70-ე წუთზე, “რეალ სოსიედადის” გოლის სადავო სიტუაციაში გაუქმების შემდეგ კარიმ ბენზემამ ანგარიშში სხვაობა ორამდე გაზარდა. 83-ე წუთზე მერინომ ერთი გოლი გაქვითა, თუმცა ეს მატჩის შემოსატრიალებლად საკმარისი არ გამოდგა.

ასე რომ, ლა ლიგი სატურნირო ცხრილის სათავეში 30 ტურის შემდეგ მადრიდის “რეალი” იქნება, რომელსაც “ბარსელონას” მსგავსი ქულების ოდენობა აქვს. “რეალ სოსიედადი” კი 47 ქულით მეექვსე პოზიციას იკავებს.