კლოპი: “ლალანა “ლივერპულის” ლეგენდაა, ის გუნდს ტოვებს”
“ლივერპულის” მთავარმა მწვრთნელმა იურგენ კლოპმა გუნდის ნახევარმცველ ადამ ლალანას შესახებ ისაუბრა, რომელიც ამ სეზონის ბოლოს კლუბს დატოვებს.
“უკვე ყველასათვის გასაგებია, რომ ადამი გუნდს დატოვებს. ის ჯერ ჩვენთანაა, მაგრამ უკვე მენატრება. ლალანა საწვრთნელი პროცესის თვალსაზრისით ერთ-ერთი ყველაზე გავლენიანი მოთამაშეა, ვინც კი ოდესმე მინახავს. ის ნამდვილი პროფესიონალია. უკვე ყველაფერი გადაწყვეტილია. თუ მოედანზე მისი დახმარება დაგვჭირდება, ამ მხრივ პრობლემა არ გვექნება. ლალანა ჯერ ჩვენთანაა და ასი პროცენტით იხარჯება.
ჯერჯერობით მისი დახმარება არ გვჭირდება, ამიტომ მხოლოდ ვარჯიშით შემოიფარგლება. ფეხბურთელებთან ხშირი საუბარი გვქონდა კონტრაქტების თაობაზე. ლალანას შემთხვევაში დისკუსიაც კი არ ყოფილა, ყველაფერი გასაგები იყო, ორივე მხარეს გვსურდა ხელშეკრულების გახანგრძლივება, მაგრამ ადამი საკუთარ მომავალს რისკის ქვეშ არ დააყენებდა. მას შემდეგ, რაც მე “ლივერპულში” მოვედი, ადამი გუნდისთვის ერთ-ერთი ყველაზე მნიშვნელოვანი მოთამაშე გახდა. მე მას სამომავლოდ წარმატებას ვუსურვებ. ჩემი შეფასებით, ადამი უკვე არის “ლივერპულის” ლეგენდა. მომდევნო სეზონში შესაძლოა, სხვა გუნდის ლეგენდა გახდეს”, – კლოპის კომენტარი “გარდიანმა” გამოაქვეყნა.
