როდის იწყება ტოპ-ჩემპიონატებში 2020-21 წლების სეზონი?
მსოფლიოში მძვინვარე კორონავირუსის პანდემიამ უარყოფითი გავლენა ფეხბურთზეც იქონია.მსოფლიოს ტოპ-ჩემპიონატების ნაწილმა შეწყვეტილი სეზონის დასრულება შეძლო. სამწუხაროდ, მათ შორის ვერ მოხვდა ნიდერლანდებისა და საფრანგეთის ჩემპიონატები.
ლა ლიგის 2019/20 წლების სეზონი უკვე დასრულდა – ჩემპიონი მადრიდის “რეალი” გახდა. მომდევნო სეზონი 12 სექტემბერს აიღებს სტარტს და 2021 წლის 23 მაისს დასრულდება.
სერია A-ს მიმდინარე სეზონი უკვე უახლოვდება კულმინაციას. “იუვენტუსს” მორიგი “სკუდეტოს” მოსაგებად ერთი გამარჯვება სჭირდება. ახალი სეზონის დაწყების თარიღთან დაკავშირებით კი იტალიის ფეხბურთის ფედერაციას ოფიციალური გადაწყვეტილება ჯერ არ მიუღია. სავარაუდოდ, იტალიაში ახალი საფეხბურთო სეზონი პირველ სექტემბერს გაიხსნება.
უკვე დასრულდა ბუნდესლიგის 2019/20 წლების საფეხბურთო სეზონიც. ჩემპიონის ფარი კვლავაც მიუნხენის “ბაიერნმა” დაისაკუთრა. ახალი სეზონი სტარტს 18 სექტემბერს აიღებს და 2021 წლის 22 მაისს დასრულდება.
საფრანგეთის ჩემპიონატი, რომლის გასული სეზონიც მარტში შეწყდა და ჩემპიონად “პსჟ” გამოცხადდა, 22 აგვისტოს განახლდება ახალი სეზონით და 2021 წლის 23 მაისს დასრულდება.
