ფეხბურთის ფედერაცია “ლანჩხუთის” ქალთა გუნდს 45 ათას ლარს ჩაურიცხავს

თარიღი: ნოემბერი 21, 2020

ქალთა საფეხბურთო გუნდი “ლანჩხუთი” ჩემპიონთა ლიგის დასკვნით ეტაპზე გავიდა და 32 საუკეთესო გუნდში იასპარეზებს. “ლანჩხუთმა” სოციალურ ქსელში განცხადება გამოაქვეყნა.

“უფ, ეს რა იყო!

საფინალო სასტვენი, მასპინძელთა გაოცებული სახეები და ჩვენი გოგონების სიხარულის ცრემლები – ასეთი იყო 2020 წლის 19 ნოემბრის ისტორიული მატჩის ფინალი რუმინეთის ქალაქ კლუჟში, ამ მოვლენის მნიშვნელობა შეიძლება ბოლომდე ვერც კი გავათვითცნობიერეთ, მაგრამ ერთი რამ იყო ძალიან ცხადი – შევძელით გაგვეხარებინა ჩვენი ქვეყანა, რომლისთვისაც ყოველ ასეთ წარმატებას უდიდესი მნიშვნელობა აქვს.

ყველას ძალიან დიდი მადლობა იმ თბილი სიტყვებისთვის, მოლოცვებისთვის, გვერდში დგომისთვის და მხარდაჭერისთვის, დიდი მადლობა მთელ საქართველოს და განსაკუთრებით ჩვენს პატარა ლანჩხუთს, სადაც დიდი და პატარა ამ მატჩის მოლოდინით ცხოვრობდა.

აუცილებლად უნდა აღვნიშნოთ საქართველოს ფეხბურთის ფედერაციის
მხარდაჭერა – მათი ხელშეწყობით შესაძლებელი გახდა ეროვნული ნაკრების ტექნიკურ ცენტრში შეკრების გავლა და ასევე მატჩთან დაკავშირებული საორგანიზაციო საკითხების მოგვარება. თუმცა მთავარი სიურპრიზი წინ იყო – მატჩის შემდეგ ფედერაციის გენერალური მდივანი დავით მუჯირი მხოლოდ მოლოცვით არ შემოიფარგლა და გუნდს გააცნო ფედერაციის გადაწყვეტილება ფეხბურთელებისთვის საბონუსე ფონდის 25,000 ლარის ოდენობით, ხოლო კლუბის შემდგომი განვითარებისთვის 20,000 ლარის გამოყოფის შესახებ! დიდი მადლობა ლევან კობიაშვილსა და დავით მუჯირს.

ვთვლით, რომ საქართველოს ფეხბურთის ფედერაცია აკეთებს შესაძლებლობის მაქსიმუმს, უფრო მეტ მხარდაჭერას ვისურვებდით ადგილობრივი ხელისუფლებისგან, რომ საერთო ძალისხმევით კლუბს შეექმნას სათანადო ყოფითი და ფინანსური პირობები, ევროპის საუკეთესო 32 გუნდში შესული კლუბი ამას ნამდვილად იმსახურებს.

კიდევ ერთხელ ძალიან დიდი მადლობა ჩვენს ყველა გულშემატკივარს!”, – წერია განცხადებაში.

შეგახსენებთ, რომ გუნდს გარკვეული ფინანსური პრობლემები აქვს და ფეხბურთელებს ხელფასი 4 თვეა არ აუღიათ. ლანჩხუთის მუნიციპალიტეტი კლუბს 130 ათასი ლარით აფინანსებს, თუმცა მოთამაშეთა განცხადებით, სრული დაფინანსებისთვის 250 ათასი ლარი არის საჭირო.

ზურაბ თოიძე

მსგავსი სიახლეები

ფეხბურთის ფედერაცია “ლანჩხუთის” ქალთა გუნდს 45 ათას ლარს ჩაურიცხავს

“ჩელსი” და ობამეიანგი პირად კონტრაქტზე შეთანხმდნენ

“ბარსელონა” და ბერნარდუ სილვა შეთანხმდნენ

კეილორ ნავასი ხვიჩას თანაგუნდელი ხდება

კავანი “დორტმუნდში” მიდის

“რეალის” თავდამსხმელი “ხეტაფეში” გადავიდა

თორნიკე ოქრიაშვილმა კორეულ კლუბში სამედიცინო შემოწმება ვერ გაიარა