53 წლის მიურამ “იოკოჰამასთან” კონტრაქტი გაახანგრძლივა
“იოკოჰამა” გუნდის 53 წლის ნახევარმცველ კაზუიოში მიურას ხელშეკრულებას უხანგრძლივებს. ინფორმაციას იაპონური კლუბის ოფიციალური ვებ-გვერდი ადასტურებს.
რამდენადაც ჩვენთვის ცნობილი ხდება, მიურას ახალი კონტრაქტი “იოკოჰამასთან” 2020/21 წლების სეზონის ბოლომდე დააკავშირებს. აღსანიშნავია, რომ ეს რიგით 36-ე პროფესიონალური კონტრაქტია მიურასთვის.
“იოკოჰამასთან” ხელშეკრულება სეზონის ბოლომდე გავაფორმე. გასულ სეზონში მსოფლიოში ძალიან დიდი პრობლემები შექმნა კორონავირუსის პანდემიამ, მაგრამ ხალხის წყალობით, ჩვენ კვლავ ვაგრძელებთ ფეხბურთის თამაშს.
ჩემთვის ეს საუკეთესო სეზონი ნამდვილად არ ყოფილა, მაგრამ ჩემი მონდომება და გრძნობები ფეხბურთის მიმართ მხოლოდ იზრდება. ყოველდღიურად ვშრომობ იმისათვის, რომ გუნდს უფრო მეტად დავეხმარო,” – განაცხადა მიურამ კონტრაქტის გაფორმების შემდეგ.
2020 წლის სექტემბრის თვეში მიურა გახდა ყველაზე ასაკოვანი ფეხბურთელი, რომელსაც იაპონიის ჩემპიონატის მატჩში სასტარტო შემადგენლობიდან უთამაშია.
