“ტორპედოში” ცინცაძე და კვასხვაძე ბრუნდებიან

ქუთაისის “ტორპედოში” სპონსორის გამოჩენის შემდეგ სიტუცია უკეთესობისკენ იცვლება და გუნდში ახალი ფეხბურთელები მოდიან.

ამჯერად, საუბარია ძველ სახეებზე, რომლებიც “ტორპედოში” წლების განმავლობაში თამაშობდნენ – როინ კვასხვაძეზე და მათე ცინცაძეზე.

კვასხვაძემ “დინამო თბილისი” “ნეფჩთან” დაშვებული შეცდომების გამო 3 დღის წინ დატოვა. წლები “ტორპედოს” კაპიტანი გახლდათ და ფინანსური პრობლემების გამო “დინამოში” 2020 წლის იანვარში წავიდა. ცინცაძე ალბანურ “კუკეშში” იყო და 20 დღეზე მეტია თავისუფალი აგენტია. მათე 2018 წელს შეუერთდა “ტორპედოს” და 2019 წელს “იელგავაში” გადაბარგდა. შემდეგ იყო ბათუმის “დინამო” და ბოლოს “კუკეში”.

კვასხვაძის მისვლის შემდეგ “ტორპედოში” 4 საკმაოდ კარგი მეკარე შეგროვდება – ჰამზიჩი, შოვნაძე, ასათიანი და როინი.

ქუთაისური კლუბის ყიდვის აუქციონი თვის ბოლოს უნდა შედგეს და აუქციონში დავით კერესელიძის “ნიუ ვიჟენი” და აიეტ კუკავას “ალიანს ჰოლდინგ ჯგუფი” მიიღებენ მონაწილეობას.