ვინ იქნება ხვალ – 3 აგვისტო ტოკიოს ოლიმპიურ თამაშებზე

ხვალ, 3 აგვისტოს ტოკიოს ოლიმპიურ თამაშებზე საქართველოს დელეგაციის 6 წევრი იასპარეზებს. ხალიჩაზე ვიხილავთ ბერძნულ-რომაული სტილით მოჭიდავეთა ნაკრების სამ წევრს, საკვალიფიკაციო ეტაპზე იასპარეზებენ ქართველი მძლეოსნები.

3 აგვისტო

გიორგი მელია (ბერძნულ-რომაული ჭიდაობა, 97კგ)

გიორგი მელია დღეს 1/8-ფინალში რუსეთის ოლიმპიური კომიტეტის წარმომადგენელ მუსა ევლოევთან დამარცხდა. ევლოევი ფინალში გავიდა, რის გამოც ქართველ მოჭიდავეს დამამშვიდებელ წრეში გამოსვლის საშუალება მიეცა. ხვალ, 06:00 საათიდან, მელია დამამშვიდებელ წრეში იჭიდავებს და ბრინჯაოს მედლის მოპოვების შანსი ექნება.

რამაზ ზოიძე (ბერძნულ-რომაული ჭიდაობა, 67კგ)

რამაზ ზოიძე შეჯიბრში 1/8-ფინალიდან ჩაერთვება. მისი პირველი მეტოქე რიოს ოლიმპიური თამაშების გამარჯვებული და მსოფლიოს ორგზის ჩემპიონი, კუბელი ისმაელ ბორერო იქნება. ეს დაპირისპირება, დაახლოებით, 07:10 საათზე დაიწყება.

ლაშა გობაძე (ბერძნულ-რომაული ჭიდაობა, 87კგ)

გობაძის პირველი მეტოქე 1/8-ფინალში უზბეკი რუსტამ ასაკალოვი იქნება. ეს შეხვედრა 07:00 საათის შემდეგ დაიწყება.

ლაშა ღულელაური (მძლეოსნობა, სამხტომი)

ქართველი მძლეოსანი საკვალიფიკაციო ეტაპზე, A ჯგუფში გამოვა. ფინალში მოსახვედრად, საჭიროა, რომ ის 12 საუკეთესო სპორტსმენს შორის მოხვდეს. შეჯიბრი 04:00 საათიდან დაიწყება.

გიორგი მუჯარიძე (მძლეოსნობა, ბირთვის კვრა)

მუჯარიძე საკვალიფიკაციო ეტაპზე, A ჯგუფში იასპარეზებს. ფინალში გადასასვლელად საჭიროა, რომ ის 12 საუკეთესო სპორტსმენს შორის მოხვდეს. შეჯიბრი 14:15 საათზე დაიწყება.

ბენიკ აბრამიანი (მძლეოსნობა, ბირთვის კვრა)

აბრამიანი ასპარეზობას საკვალიფიკაციო ეტაპზე, B ჯგუფში 15:40 საათიდან დაიწყებს. ფინალში გადასასვლელად საჭიროა, რომ ის 12 საუკეთესო სპორტსმენს შორის მოხვდეს.

იმისათვის, რომ არ გამოგრჩეთ არცერთი სიახლე ქართველი ოლიმპიელების გამოსვლებზე, თვალი ადევნეთ:

• ფეისბუქ გვერდს საქართველო ოლიმპიურ თამაშებზე
• Fanebi.Com-ის ვებ-გვერდს
• ფეისბუქ გვერდს FANEBI.COM