ვლადიმერ ხინჩეგაშვილი: “ცხოვრებაში არის მომენტები, როცა ცვლილებების დროა”
ოლიმპიურმა ჩემპიონმა ვლადიმერ ხინჩეგაშვილმა სოციალურ ქსელში კარიერის დასრულების შესახებ განცხადება გამოაქვეყნა.
“მადლობა უფალს ყველაფრისთვის, რაც მომცა!
დიდი მადლობა მინდა გადავუხადო ჩემს მშობლებს, პირად და ნაკრების მწვრთნელებს, ექიმებს, ჭიდაობის ფედერაციას, იმ სპორტსმენებს, ვისთან ერთადაც ერთი დღე მაინც მივარჯიშია და ყველას, ვისაც ჩემს წარმატებაში მცირედი წვლილი მაინც მიუძღვის.
რა თქმა უნდა, დიდ მადლობას ვუხდი ყველა ჩემს გულშემატკივარს, რომლებიც მთელი კარიერის განმავლობაში უდიდეს მოტივაციას მაძლევდნენ. ჩემი უმთავრესი მიზანი ყოველთვის იყო ჩემი ქვეყნის და ხალხისთვის სიხარულის მოტანა. მოხარული ვარ, რომ მიზანს გარკვეულწილად მივაღწიე და არაერთხელ მომეცა შანსი ამაყად მომესმინა უდიდეს სპორტულ ღონისძიებებზე გაჟღერებული საქართველოს ჰიმნი.
ჭიდაობამ შექმნა ის, ვინც ვარ დღეს და მე ამის ყოველთვის მადლიერი ვიქნები.
რა თქმა უნდა, ძალიან რთული იყო ამ გადაწყვეტილების მიღება. იმედი მქონდა, რომ ტოკიოდან კიდევ ერთხელ გაგახარებდით, მაგრამ, სამწუხაროდ, არ მომეცა ამის საშუალება. ცხოვრებაში არის მომენტები, როცა ცვლილებების დროა და ჩემს ცხოვრებაშიც დადგა ეს მომენტი.
და ბოლოს, ბევრი ახსნის გარეშე, უდიდესი მადლობა დედაჩემს, რომლის უპირობო გვერდში დგომის გარეშე ვერაფერს შევძლებდი”, – განაცხადა 30 წლის ხინჩეგაშვილმა.
შეგახსენებთ, რომ ლადო რიოს ოლიმპიური თამაშების გამარჯვებული, მსოფლიო ჩემპიონი და ევროპის სამგზის ჩემპიონია.
ხინჩეგაშვილი პარტია “ქართული ოცნების” გორის მერობის კანდიდატი იქნება.
