ეტო: “რეალს” მსოფლიოში საუკეთესო ცენტრფორვარდი ჰყავს”

კატალონიის “ბარსელონას” ყოფილმა ვარსკვლავმა, სამუელ ეტომ, კარიმ ბენზემას მიმართ საქებარი სიტყვები არ დაიშურა. ფრანგი თავდამსხმელი მიმდინარე სეზონში “რეალის” ლიდერი გახლავთ ლა ლიგაში გატანილი 6 გოლითა და გაკეთებული 5 საგოლე გადაცემით.

“რეალს” მსოფლიოში საუკეთესო ცენტრფორვარდი ჰყავს, მათ ამით ტრაბახის სრული უფლება აქვთ. სეზონის ბოლოს “რეალი” ყოველთვის სერიოზულ ძალას წარმოადგენს.

რა თქმა უნდა ვთვლი, რომ ბენზემას სათანადოდ ვერ აფასებენ. თუმცა ფეხბურთში ასეთი რაღაცებიც ხდება ხოლმე. ზოგი ფეხბურთელი დაუფასებელი რჩება, ზოგი კი პირიქით – გადაფასებულია.

მე თუ მკითხავთ, კარიმ ბენზემა იმ ფეხბურთელთა რიცხვში შედის, რომლებიც ოქროს ბურთს იმსახურებენ. ასეთი ფეხბურთელები ყოველთვის არსებობდნენ – რაული, მალდინი, რობერტო კარლოსი და სხვანი,” – აცხადებს ეტო.