ქეცბაია: “ამბობდნენ, რომ ყველაზე ცუდი მწვრთნელი ვიყავი, ახლა კი საუკეთესო ვარ”

კვიპროსის ჩემპიონატის მე-8 ტურში თემურ ქეცბაიას გაწვრთნილი “ანორთოსისი” სტუმრად ნიქოზიის “ომონიას” დაუპირისპირდა და ნიკა კაჭარავას გოლის წყალობით, 1:0 გაიმარჯვა.

გამარჯვების შემდეგ, ქეცბაიამ კომენტარი გააკეთა:

“მინდა, ჩემს ფეხბურთელებს გამარვჯება მივულოცო. ბოლო 2-3 კვირა ჩვენთვის ადვილი არ ყოფილა. ჩამოხვიდე აქ, ითამაშო “ომონიას” წინააღმდეგ და გაიმარჯვო, მარტივი არ არის. ეს ჩვენი მუშაობის დასასრული არ არის. ყველა მატჩი მნიშვნელოვანია და წინსვლა უნდა გავაგრძელოთ.

გვჯერა, რომ ჩვენ საუკეთესო გუნდი გვყავს. შეიძლებოდა, რომ ახლა უფრო მეტი ქულა გვქონოდა. გასულ კვირაში ამბობდნენ, რომ ყველაზე ცუდი მწვრთნელი ვიყავი, დღეს კი ამბობენ, რომ საუკეთესო ვარ”, – თქვა ქართველმა მწვრთნელმა.

შეგახსენებთ, რომ “ანორთოსისმა” სეზონი არასტაბილურად დაიწყო. გუნდს ჩემპიონატში 7 ტურის შემდეგ 9 ქულა აქვს მოპოვებული და მე-6 ადგილზე იმყოფება.