ლაუტარო: “მესი “ბარსელონაში” მეპატიჟებოდა”

მილანის “ინტერის” თავდამსხმელმა ლაუტარო მარტინესმა თქვა, რომ ლიონელ მესი მას “ბარსელონაში” იწვევდა. ზაფხულის სატრანსფერო პერიოდში კატალონიური გუნდი მართლაც იყო 24 წლის ფეხბურთელით დაინტერესებული.

“სიმართლეა, რომ მესის “ბარსელონაში” ჩემი ხილვა სურდა. ჩვენ არგენტინის ნაკრების ბანაკში ამის თაობაზე ბევრს ვსაუბრობდით. ლეო კლუბში არსებულ სიტუაციაზე მიყვებოდა, თუმცა მე “ინტერთან” მსურდა ხელშეკრულების გაგრძელება და ასეც მოვიქეცი. მიხარია, რომ აქ დავრჩი, ჩემი ოჯახი იტალიაში ბედნიერია”, – ციტირებს ლაუტარო მარტინესის სიტყვებს “სპორტმედიასეტი”.

შეგახსენებთ, რომ “ინტერსა” და ლაუტარო მარტინესს შორის გაფორმებულ მოქმედ კონტრაქტს ვადა 2026 წლის ზაფხულამდე აქვს. არგენტინელმა თავდამსხმელმა იტალიის სერია A-ს მიმდინარე გათამაშებაში ჩატარებულ 14 მატჩში რვა გოლი და ორი შედეგიანი გადაცემა მიითვალა.