კახა ცხადაძეს ნაკრების ორი ფეხბურთელის დამატება სურს

“დინამო თბილისი” ალექსანდრე რეხვიაშვილისა და კახა ცხადაძის ხელმძღვანელობით ახალი სეზონისთვის დიდი ცვლილებებისთვის ემზადება და გუნდიდან უკვე გაუშვეს შვიდი ფეხბურთელი, მათ შორის, ჯანო ანანიძე.

“დინამო” გაძლიერებას აკადემიიდან დაწინაურებული ფეხბურთელების გარდა საქართველოს ნაკრების წევრებით აპირებს და მოლაპარაკებები ბუბა დაუშვილთან და დავით ვოლკოვთან მიმდინარეობს. Azerisport-ის ინფორმაციით, ცხადაძეს გუნდში ვოლკოვის ხილვა სურს, რომელიც აზერბაიჯანის ჩემპიონატის ბომბარდირია და ბოლო 2 მატჩი ნაკრებში პირდაპირი მნიშვნელობით დაფრინავდა.

ვოლკოვი 2013-16 წლებში “დინამოში” ირიცხებოდა, მაგრამ მხოლოდ ოთხ შეხვედრაში მიიღო მონაწილეობა, უფრო მეტად, “დინამო 2-ში” ასპარეზობდა.

დაუშვილმაც ახალგაზრდული კარიერა “დინამო 2-ში” დაიწყო, თუმცა მთავარ გუნდში არ გადასულა და 2005 წლიდან 2011 წლამდე “ზესტაფონში” იყო. ახლა “აპოელის” ღირსებას იცავს, მაგრამ ბოლოს ტრავმა ჰქონდა.

თბილისელების პირველი ტრანსფერი “გაგრადან” მეკარე დავით კერესელიძეა.