რუსეთში მოთამაშე ქართველი ვარსკვლავები უკრაინას მხარდაჭერას ჯერჯერობით არ უცხადებენ
მთელი ქართული სპორტული სამყაროს წარმომადგენლები ბოლო ორი დღეა უკრაინას რუსეთთან ომში მხარდაჭერას სოციალურ ქსელში უცხადებენ.
სამწუხაროდ, რუსეთში მოთამაშე ქართველი ვარსკვლავები, მათ შორის, ხვიჩა კვარაცხელია, ზურიკო დავითაშვილი, ჯიმი ტაბიძე და თორნიკე შენგელია ომთან დაკავშირებით არანაირ განცხადებას არ აკეთებენ.
ცოტა ხნის წინ გავრცელებული ინფორმაციის თანახმად, საფეხბურთო კლუბ მოსკოვის “ცსკა”-ს ლეგიონერები კლუბში დაბრუნებაზე უარს აცხადებენ. საკალათბურთოს შესახებ ცნობა არ გავრცელებულა.
უკრაინას მხარდაჭერა გამოუცხადეს შოთა და აჩი არველაძეებმა, ჯაბა კანკავამ, თორნიკე ოქრიაშვილმა, გიორგი წიტაიშვილმა, ზურაბ ხიზანიშვილმა, ვაკო ყაზაიშვილმა, გიორგი ნავალოვსკიმ, ოთარ კაკაბაძემ, გიორგი ცინცაძე, მანუჩარ მარკოიშვილმა, სანდრო მამუკელაშვილმა, ზაზა ფაჩულიამ და სხვებმა.
შესაძლოა, რუსეთში მოთამაშე ქართველი სპორტსმენები პირად საუბრებში უკრაინის მიმართ სოლიდარობას გამოხატავენ, მაგრამ ფაქტია, მათ ამ ქვეყნისა და ხალხის მიმართ მხარდაჭერა საჯაროდ ჯერ არ გამოუცხადებიათ.
შეგახსენებთ, რომ საქართველოს საკალათბურთო ნაკრების კაპიტანი თორნიკე შენგელია მოსკოვის ცსკა-ს ღირსებას იცავს, ხვიჩა კვარაცხელია ყაზანის “რუბინში” თამაშობს, ზურიკო დავითაშვილი ტულის “არსენალის” წევრია, ხოლო ჯემალ ტაბიძე “უფას” რიგებშია.
