“ოქროს ბუცი” ზედიზედ მეორედ

მიუნხენის “ბაიერნის” თავდამსხმელი რობერტ ლევანდოვსკი 2021-2022 წლების სეზონის შედეგებით “ოქროს ბუცის” მფლობელი გახდა.

პოლონელმა ფეხბურთელმა 35 გოლი გაიტანა და 70 ქულა მოაგროვა (გოლების რაოდენობა მრავლდება 2-ზე ანუ ტურნირის კოეფიციენტზე). აღსანიშნავია, რომ ლევანდოვსკი “ოქროს ბუცის” გამარჯვებული ზედიზედ მეორედ გახდა. შარშან მან 41 ბურთი გაიტანა.

მეორე ადგილი 28 გოლით “პარი სენ-ჟერმენის” ფორვარდმა კილიან მბაპემ დაიკავა (56 ქულა).

მესამე-მეოთხე პოზიციები 27-27 გატანილი ბურთით რომის “ლაციოს” თავდამსხმელმა ჩირო იმობილემ და მადრიდის “რეალის” შემტევმა კარიმ ბენზემამ დაიკავეს (54-54 ქულა)

მოგებული “ოქროს ბუცის” რაოდენობით რეკორდსმენი “პარი სენ-ჟერმენის” თავდამსხმელი ლიონელ მესი გახლავთ, რომელსაც ეს ჯილდო ექვსჯერ აქვს დასაკუთრებული. სიაში ოთხი “ოქროს ბუცით” მეორე ადგილზეა “მანჩესტერ იუნაიტედის” შემტევი კრიშტიანუ რონალდუ.