ალეგრი: “მიუნხენში უნდა მოვიგოთ”
უეფას ჩემპიონთა ლიგის მერვედფინალურ ეტაპზე ტურინის “იუვენტუსსა” და მიუნხენის “ბაიერნს” შორის გამართული პირველი შეხვედრა ფრედ, ანგარიშით 2:2 დასრულდა. მატჩი “ბებერი სინიორას” მთავარმა მწვრთნელმა მასიმილიანო ალეგრიმ შეაჯამა.
“მომდევნო ეტაპზე გასასვლელად რომელიმე მატჩი უნდა მოგვეგო. შინ ვერ გავიმარჯვეთ, ამიტომ ეს მიუნხენში უნდა გავაკეთოთ.
გუნდმა კარგად ითამაშა, თუმცა ეს მეორე ტაიმზე უფრო ითქმის, ვინაიდან პირველ ნახევარში ბევრი შეცდომა დავუშვით. დაცვაში უკეთ უნდა გვეთამაშა. შეტევაში რამდენიმე სახიფათო მომენტი შევქმენით.
მეორე ტაიმში გუნდმა თავდაჯერებულობა დაიბრუნა. ჩემპიონთა ლიგაზე ასპარეზობისას საკუთარ ძალებში დარწმუნებული უნდა იყო.
გვჯერა, რომ მომდევნო ეტაპზე გასვლა შეგვიძლია. ორი გატანილი ბურთი თვითდაჯერებას გვმატებს, თუმცა ახლა სერია A-ზე უნდა ვიფიქროთ”, – ციტირებს ალეგრის სიტყვებს Football Italia.
შეგახსენებთ, რომ “ბაიერნსა” და “იუვენტუსს” შორის განმეორებითი მატჩი 16 მარტს შედგება.
