ალექსის სანჩესის რეკორდი

ფიფას კონფედერაციათა თასის ჯგუფურ ეტაპზე გერმანიისა და ჩილეს ნაკრებებს შორის გამართული მატჩი ფრედ, ანგარიშით 1:1 დასრულდა. სამხრეთამერიკელთა მხრიდან ბურთი ალექსის სანჩესმა გაიტანა, რომელმაც ამ გოლით რეკორდიც დაამყარა. კერძოდ, ალექსის სანჩესმა ჩილეს ნაკრების რიგებში 38-ე ბურთი გაიტანა, რაც საუკეთესო მაჩვენებელია. მან აღნიშნული რეკორდის დამყარებას 106 მატჩი მოანდომა. წინა რეკორდი ლეგენდარულ მარსელო სალასს ეკუთვნოდა, რომელმაც თავის დროზე ნაკრების ფორმით 37 გოლის გატანა მოახერხა.

გარდა ამისა, ალექსის სანჩესის მიერ გატანილი ბურთი კონფედერაციათა თასის ისტორიაში მე-400 გოლი გამოდგა.

შეგახსენებთ, რომ ალექსის სანჩესი ჩილეს ნაკრების ღირსებას 2006 წლიდან იცავს.