ანჩელოტი: “ნაპოლი” უდიდესი პოტენციალის მქონე გუნდია”
“ნაპოლის” მთავარმა მწვრთნელმა, კარლო ანჩელოტიმ, იტალიის სერია A-ს გახსნითი მატჩის შემდეგ პრესასთან ისაუბრა. იტალიის ჩემპიონატის პირველ ტურში “ნაპოლი” “ფიორენტინას” ეწვია და დაძაბულ ბრძოლაში 3:4 იმარჯვა.
“დღეს ჩვენ საკმაოდ მაღალ დონეზე წარმოვაჩინეთ ჩვენი შესაძლებლობები. “ფიორენტინასთან” გასვლაზე თამაში ყოველთვის რთულია და ჩვენ სრულად გვქონდა გაანალიზებული მათი ძალები.
“ნაპოლი” უდიდესი პოტენციალის მქონე გუნდია. დღეს ჩვენ კიდევ ერთხელ დავამტკიცეთ, რომ ძლიერი და კონკურენტუნარიანი გუნდი გვყავს.
“ფიორენტინას” ფანებს დიდ პატივს ვცემ, თუმცა ფაქტია, რომ მათ შორის არიან უზრდელი გულშემატკივრები, რომლებიც მთელი მატჩის განმავლობაში ცდილობდნენ ჩემს შეურაცხყოფას.
ბოლოს, მინდა გამოჯანმრთელება ვუსურვო მაურიციო სარის. სამწუხაროა, რომ მომდევნო მატჩში მას ვერ შევხვდები. “იუვენტუსთან” შეხვედრა ჩვენთვის უმნიშვნელოვანესი იქნება,” – აცხადებს იტალიელი სპეციალისტი.
