ანდრეი შევჩენკომ კარიერის საუკეთესო თერთმეტეული დაასახელა
კიევის “დინამოს”, “მილანისა” და ლონდონის “ჩელსის” ყოფილმა თავდამსხმელმა, ანდრეი შევჩენკომ თავისი კარიერის განმავლობაში გამორჩეული თანაგუნდელებისა და მეტოქეებისაგან სიმბოლური ნაკრები შეადგინა. ჟურნალ Four Four Two-ს ვებ-გვერდზე უკრაინის ეროვნული ნაკრების მთავარი მწვრთნელის საუკეთესო თერთმეტეული გამოქვეყნდა.
მეკარე: ჯანლუიჯი ბუფონი
“გამორჩეული მეკარე, რომელსაც ბრწყინვალე რეაქცია აქვს. მას 2003 წელს, ჩემპიონთა ლიგის ფინალში, პენალტების სერიაში გადამწყვეტი გოლი გავუტანე. თუმცა, მან ჩემი დარტყმული ბურთი არაერთხელ მოიგერია, მისთვის გოლის განატა კი რთული იყო.”
მცველები
მარჯვენა მცველი: კაფუ
“ნამდვილი მებრძოლი და გულწრფელი ადამიანი. ის ძალიან ძლიერი იყო და შეეძლო თავისი საჯარიმოდან მეტოქის საჯარიმომდე ძალიან სწრაფად მისულიყო. ასევე, კაფუს ხუმრობა უყვარდა, რითაც ხშირად გვახალისებდა.
ცენტრალური მცველი: ჯონ ტერი
“სტაბილური და ბუნებით ლიდერი. მას პანიკაში ჩავარდნილი თანაგუნდელის დამშვიდება შეეძლო. ასევე, ყველას მოგეხსენებათ, თუ როგორ საშიშროებას ქმნის მეტოქის საჯარიმოში კუთხურის დროს.”
ცენტრალური მცველი: ალესანდრო ნესტა
“მე არ მინახავს მცველი, რომელიც თამაშს ისე კითხულობდეს, როგორც ალესანდრო ნესტა. ის ძალიან ჭკვიანი და სწრაფი მოთამაშე იყო. 2003 წელს, ჩემპიონთა ლიგის მოგებაში მან დიდი წვლილი როლი ითამაშა.”
მარცხენა მცველი: პაოლო მალდინი
“ყველაზე მშრომელი ფეხბურთელი, რომელიც კარიერის განმავლობაში მინახავს. მას ნებისმიერ პოზიციაზე შეეძლო თამაში. რაც მთავარია, იყო ნამდვილი ლიდერი. ის დაცვაშიც და შეტევაშიც ბრწყინვალედ მოქმედებდა.”
ნახევარმცველები
მარჯვენა ნახევარმცველი: კაკა
“კრეატიული მაესტრო. დიდი პატივია, როცა კაკას თანაგუნდელი ხარ. ის შესანიშნავ პასებს აკეთებდა, ასისტენტობაც ძალიან ხშირად გამიწია.”
ცენტრალური ნახევარმცველი: სტივენ ჯერარდი
“მსოფლიო დონის ნახევარმცველი. ის კარგი ლიდერის მაგალითია. ჯერარდს ბევრი სირბილი და მცველების მოტყუებაც უყვარს, აქვს კარგი და ზუსტი დარტყმა.”
ცენტრალური ნახევარმცველი: ზინედინ ზიდანი
“ის ნამდვილი ჯადოქარი იყო, რომელსაც ტექნიკური და ძლიერი დარტყმა ჰქონდა. მოედანზე წინასწარ ვერასოდეს განსაზღვრავდი, თუ რას მოიმოქმედებდა. მოედნის მიღმაც, ის ძალიან კარგი ადამიანია.”
მარცხენა ნახევარმცველი: ლიონელ მესი
“ძალიან რთულია ისეთი ფეხბურთელის პოვნა, რომელსაც მესის მსგავსი დრიბლინგი აქვს. ის 21-ე საუკუნის საუკეთესო შემტევი ფეხბურთელია. სიმართლე გითხრათ, მისი ზუსტი პოზიციის განსაზღვრაც კი მიჭირს. მესი ყველგანაა და მცველებს ცუდ დღეში აგდებს.”
თავდამსხმელები
რონალდო
“ტექნიკური და ძლიერი თავდამსხმელი. გადახედეთ მის სტატისტიკას ნებისმიერ გუნდში. წარმომიდგინენია, კიდევ რამდენს გააკეთებდა ის, ტრავმებს რომ ხელი არ შეეშალათ.”
უეინ რუნი
“თანამედროვე ფეხბურთში მასსავით მშრომელ ფეხბურთელს ვერ ნახავთ. ბევრი ფეხბურთელისაგან განსხვავებით, მას თავის თავზე დიდი წარმოდგენა არ აქვს. მოკლედ, რუნი იმ ტიპის მოთამაშეა, რომელსაც ნებისმიერი მწვრთნელი ძირითად შემადგენლობაში ათამაშებდა.”
სათადარიგოები:
პეტრ ჩეხი, კარლეს პუიოლი, მიხაელ ბალაკი, ფრენკ ლამპარდი, ანდრეა პირლო, რაიან გიგზი, კრიშტიანო რონალდუ.
