აფრიკის თასის მეორე ფინალისტის ვინაობაც ცნობილია (ვიდეო)

კამერუნისა და განის ნაკრებებს შორის 2017 წლის აფრიკის ერთა თასის მეორე ნახევარფინალური მატჩი გაიმართა.

შეხვედრის პირველი ტაიმი უმეტესწილად თანაბარ ბრძოლაში წარიმართა. საგოლე მომენტი ორივე კართან შეიქმნა, მაგრამ ფეხბურთელებმა საწყის 45 წუთში ეპიზოდის რეალიზება ვერ მოახერხეს. ანგარიში 72-ე წუთზე გაიხსნა. სტანდარტულის შესრულების შემდეგ ბურთი მეტოქის საჯარიმოში კამერუნელთა მცველ ნგადეუ-ნგაჯუის მიუვიდა და მანაც შორეულ კუთხეში ზუსტი დარტყმით საკუთარი გუნდი დააწინაურა. განელებმა წონასწორობის აღსადგენად გაიბრძოლეს, მაგრამ კომპენსირებულ დროში მეორე ბურთიც მიიღეს. სწრაფი კონტრშეტევა მეკარესთან ერთ-ერთზე გასულმა ბასოგოგმა დააგვირგვინა — 2:0.

ამრიგად, 2017 წლის აფრიკის თასის ფინალში ეგვიპტის ნაკრების მეტოქე კამერუნი იქნება. ტურნირის გადამწყვეტი მატჩი 5 თებერვალს შედგება, ერთი დღით ადრე კი მესამე ადგილისთვის ერთმანეთს ბურკინა ფასოსა და განის ნაკრებები შეეცილებიან.

აფრიკის ერთა თასი
ნახევარფინალი
კამერუნი — განა 2:0 (0:0)
გოლები: ნგადეუ-ნგაჯუი 72′, ბასოგოგი 90+3′.