არანი სუმოს გამოემშვიდობა

გუშინ სუმოს სამყაროში ძალიან მოულოდნელი ინფორმაცია გავრცელდა – რუსმა სუმოისტმა ალან გაბარაევმა, იგივე არანმა სპორტული კარიერის დასრულება გადაწყვიტა და ამის შესახებ ოფიციალური განცხადებაც გააკეთა. 29 წლის ვლადიკავკაზელმა სეკიტორმა ამის მიზეზად ძალის დაკარგვა დაასახელა, რომელიც მისი წონის დაკლებით იყო გამოწვეული (ბოლო პერიოდში არანის წონა 142 კგ-მდე შემცირდა).

მართალია, ბოლო ტურნირზე, რომელზეც აღმოსავლეთის მე-7 მაეგაშირას სტატუსით ირჯებოდა, გაბარაევი ძალიან ცუდად გამოიყურებოდა და ფაქტიურად სრულად ჩაუვარდა (12 ორთაბრძოლა წააგო 15-დან), მაგრამ ასეთ გადაწყვეტილებას მისგან მაინც არავინ ელოდა.

არადა, უახლოეს დღეებში არანი თავისი მიჰოგასეკის სკოლიდან კასუგანოს სკოლაში უნდა გადაბარგებულიყო, რადგან მისი მშობლიური სკოლა იხურება. კლუბის პრეზიდენტს, ოიაკატა მოჰოგასეკის 1 თვეში 65 წელი უსრულდება და პენსიაში უნდა გავიდეს. აქედან გამომდინარე, იაპონური სუმოს აოსციაციის დირექტორთა საბჭომ კლუბის დახურვის გადაწყვეტილება მიიღო და ოსი სუმოისტი ოიაკატა კასუგანოსთან გადაიყვანა, სადაც მას თავისი მეგობრები, ქართველი ლევან გორგაძე (ტოჩინოშინი) და ბულგარელი დანიელ ივანოვი (აოიამა) უნდა დახვედროდნენ. თუმცა არანის სუმოდან წასვლის გამო ერთ კლუბში მათი მეგობრობა ვეღარ გაგრძელდება.

ალან გაბარაევის დებიუტი პროფესიულ სუმოში 2007 წლის იანვარში შედგა, მას შემდეგ რაც იგი მსოფლიოს ჩემპიონი გახდა მოყვარულთა შორის. დებიუტიდან ზუსტად წელიწადნახევარში მან ჯურიოს დივიზიონს უწია და სეკიტორის ელიტარული წოდება მიიღო. ხოლო 2008 წლის ნოემბერში არანი უკვე მაკუუჩიში გადმოვიდა და იქედან მოყოლებული მუდმივად უმაღლეს დივიზიონში ასპარეზობდა.

2010 წლის სექტემბერში არანმა სეკივაკეს წოდება მოიპოვა, რომელსაც მხოლოდ 1 ბაშო ატარებდა. სხვათა შორის, ოსმა სუმოისტმა ეს ისე გააკეთა, რომ მანამდე კომუსუბის ტიტულიც არ ქონდა მოპოვებული. მე-2 მაეგაშირას რანგში მან 11 ორთაბრძოლა მოიგო, ბაშოს ვიცე-ჩემპიონი გახდა, კანტო-შო (მებრძოლი სულის პრიზი) დაიმსახურა და იქედან გამომდინარე, რომ უშუალო კონკურენტებმაც ვერ იყოჩაღეს იმ ბაშოზე, მას პირდაპირ სეკივაკეს ტიტული მიანიჭეს (კომუსუბის გამოტოვებით).

საერთო ჯამში არანმა მაკუუჩი დივიზიონში 29 ბაშო (435 ორთაბრძოლა) ჩაატარა, სადაც 196 შერკინება მოიგო, ხოლო 239 დათმო; ერთ ბაშოზე იცავდა სეკივაკეს წოდებას, ორზე – კომუსუბის; ორჯერ გახდა ბაშოს ვიცე-ჩემპიონი და ორჯერ მიიღო მებრძოლი სულის პრიზი, კანტო-შო.

სხვათა შორის, არანი ერთ-ერთი იმ იშვიათ სუმოისტთაგანია, რომელიც არასოდეს არ მოხსნილა ტურნირიდან, ტრავმის გამო.

აღსანიშნავია, რომ ალან გაბარაევს სამივე ქართველ სუმოისტთან ახლო მეგობრული ურთიერთობა აკავშირებს.