ანალიზი: “დინამოს” ჩისკო უნდა გაეშვა
თბილისის “დინამოსთან” ესპანურ სამწვრთნელო შტაბს კონტრაქტი დაუმთავრდა და როგორც ჩანს, ჩისკო მუნიოსი გუნდის მთავარი მწვრთნელი არც ფორმალურად და არც არაფორმალურად იქნება.
ჩისკოს პრო ლიცენზია არ ჰქონდა, რაც მთავარი მწვრთნელობისთვის არის საჭირო. თუმცა მიუხედავად ამ ყველაფრისა, ჩისკოს გაშვება ევროტურნირების დაწყების წინ, უბრალოდ, აუცილებელი პროცედურა გახლდათ.
ერთი მხრივ, როცა გუნდს ჩემპიონს გახდი, 1 წლის განმავლობაში საშუალებას გაძლევენ “დინამო” გაწვრთნა, ხელმძღვანელობა ვალდებულია აუცილებლად გაცადოს, მანამ სანამ, საშინელ შედეგებს არ დააფიქსირებ, მაგრამ ჩისკოს თან A ლიცენზიაც არ ჰქონდა და მისი გაშვება ახლა სჯობდა, ვიდრე სეზონის დაწყებიდან 3 კვირის შემდეგ.
ფაქტია, ჩისკოს ჩემპიონატში საუკეთესო შემადგენლობა ჰყავდა, საუკეთესო მეკარე, საუკეთესო მარცხენა მცველი, საუკეთესო ნახევარმცველი და საუკეთესო თავდამსხმელი. ამ ყველაფრის ფონზე, მატჩების უმრავლესობაში მეტოქე “დინამოს” აშკარად სჯობდა. ჩისკო არასწორ გადაწყვეტილებს იღებდა მატჩების მიმდინარეობისას, თუმცა ფაქტია, საკმაოდ აქტიურად ამხნევებდა ფეხბურთელებს და კარგი დამოკიდებულებით გამოირჩეოდა.
ჩისკოს “დინამო” გატანილი გოლის შემდეგ მაშინვე დაცვაში დგებოდა და “ვიტ ჯორჯიადან” დაწყებული, ბათუმის “დინამოთი” დამთავრებული, ყველა კლუბი ახერხებდა დედაქალაქთა წინააღმდეგ ტერიტორიული უპირატესობის მოპოვებას და მომენტების შექმნას. თუნდაც, ბოლო მატჩი ავიღოთ “ვიტ ჯორჯიასთან”, როცა “დინამო” 1-0 დაწინაურდა, მე-2 ტაიმში კი 15-20 წუთის განმავლობაში გავარდნილმა აუტსაიდერმა ბურთი დაუმალა და რამდენიმე საგოლე მომენტი შექმნა.
სამაგიეროდ, ჩისკოს ჰყავდა თავისი მოციქული, მხსნელი, გადამრჩენელი კარის დარაჯის, მეკარის, ხოსე პერალესის სახით, რომელსაც, ალბათ, კარიერაში საუკეთესო სეზონი ჰქონდა. პერალესმა ყველაზე მეტჯერ გადაარჩინა მუნიოსი გაშვებას.
იდეალური გამოსავალი ამ სიტუაციაში ჩისკოს დატოვება დე იურე და დე ფაქტო ასისტენტად იქნებოდა. ის გარკვეული დროის განმავლობაში შეძლებდა ლიცენზიის აღებას, ამასთანავე მთავარ მენტორთან ერთად გამოცდილებასაც შეიძენდა და რამდენიმე წელში, პრო ლიცენზიით ხელში, ესპანელს ყველა პირობა ექნებოდა შესრულებული ჯეროვნად, დათქმულ დროსა და ადგილას, რათა გამარჯვებები მოეპოვებინა.
