არიენ რობენი: “ჩემს სანაკრებო კარიერასთან დაკავშირებით გადაწყვეტილება მივიღე”

არიენ რობენს ბოლო წლებში რამდენიმე რთული და ხანგრძლივი ტრავმა ჰქონდა. როგორც იქნა, ჰოლანდიელი ფორმაში ჩადგა და მიმდინარე სეზონში რეგულარულად თამაშობს.

სანაკრებო პაუზის წინ “ნარინჯისფერთა” ლიდერმა მის სანაკრებო კარიერაზე ისაუბრა.

“სულ ცოტა ხნის წინ გარკვეული პერიოდის მანძილზე ვფიქრობდი, გამეგრძელებინა თუ არა ჩემი სანაკრებო კარიერა. ერთ მომენტში, იმ აზრზე ვიყავი, რომ მხოლოდ “ბაიერნისთვის” დამეხარჯა ჩემი ძალები და ეროვნული გუნდიდან წამოვსულიყავი.”

“ამ საკითხზე მნიშვნელოვანი საუბარი მქონდა ჩემს ცოლთან, ასევე ოჯახთან და მთავარ მწვრთნელთან, დანი ბლინდთან.”

“საბოლოოდ, გადავწყვიტე, რომ 2018 წლის მსოფლიოს ჩემპიონატზე გავემგზავრო და ჩემს გუნდს დავემხარო. ვნახოთ, რა იქნება ამის შემდეგ,” – განაცხადა რობენმა.