“რეალი” – ყველაზე ხელსაყრელი ვარიანტი “ქალაქელთათვის”?
ფეხბურთის გულშემატკივართა აზრები 10 დღის წინ ორად გაიყო, მაშინ, როცა ცნობილი გახდა, რომ მადრიდის “რეალი” ჩემპიონთა ლიგის ნახევარფინალურ სტადიაზე “მანჩესტერ სიტის” დაუპირისპირდებოდა.
მართლია, ზინედინ ზიდანმა მოკლე დროში ისეთი გუნდის შექმნა მოახერხა, რომლისაც უნდა გეშინოდეს, თუმცა სწორედ ეს გუნდი, ამავდროულად მეტოქეს მრავალ სახიფათო მომენტს აქმნევინებს საკუთარ კართან.
რომელი უფრო ხელსაყრელია, იმის იმედზე ყოფნა, რომ მადრიდელთა ნაჩუქარ შანსებს გამოიყენებ, თუ “ატლეტიკოს” მცველების მიერ აშენებული ეშელონების გარშემო ამაო სიარული? ან “ბაიერნის” წინააღმდეგ თამაში, რომელიც პეპ გვარდიოლას წყალობით საკმაოდ ორგანიზებული და ამავდროულად მთლიანად ჩემპიონთა ლიგაზეა კონცენტრირებული?
შეიძლება ბანალური იყოს, მაგრამ ეს მართლაც ასეა: ჩემპიონთა ლიგის ნახევარფინალურ ეტაპზე ადვილი მატჩები არ არსებობს. გთავაზობთ “რელათან” დაპირისპირების დადებით და უარყოფით მხარეებს …
სამართლიანი იქნება, თუ ვიტყვით, რომ “რეალს” ჩემპიონთა ლიგაზე (მიმდინარე სეზონში) უმართლებს. 1/16-ფინალურ ეტაპზე მათ “რომას” საკმაოდ ბევრი საჩუქარი გაუკეთეს, იმაზე გაცილებით მეტი, რაც პირველ მატჩში მოპოვებულ ჰანდიკაპს (2-0) ყოველგვარ აზრს დაუკარგავდა. სალაჰს იმ მომენტების ნახევარი მაინც რომ გამოეყენებინა, მადრიდელები დიდ გასაჭირში ჩავარდებოდნენ.
დაახლოებით იგივე სიტუაცია იყო მეოთხედფინალში, “ვოლფსბურგთან” გამართულ მატჩში. კრიშტიანო რონალდუს ბრწყინვალე თამაშისა და ჰეთ-ტრიკის გაუფერულება გერმანელებს საკმაოდ ადვილად შეეძლოთ, თუმცა “მგლებს” უბრალოდ იღბალმა უმტყუვნა.
გავიხსენოთ “პარის სენ-ჟერმენთან” გამართული მატჩიც (1-0), პარიზელებმა ნავასის კარის მიმართულებით 15 დარტყმა განახორციელეს.
ასე რომ, “სიტის” მთავარი მიზანი გოლის გატანა იქნება, რისი შესრულებაც დიდი ალბათობით არ გაუჭირდებათ. ამასთან უნდა აღინიშნოს ისიც, რომ ბოლო კვირეების მანძილზე, პელეგრინის შეგირდების კონტრ-იერიშები ნამდვილად მომაკვდინებელ იარაღად იქცა ინგლისური გრანდისათვის.
“ჩემპიონთა ლიგის ნახევარფინალში შეუძლებელია შენი მეტოქე სუსტი იყოს, თუმცა არსებობს ძლიერი და შედარებით სუსტი მეტოქეებიც. ამ შემთხვევაში მათი სტილიდან გამომდინარე, ჩვენ ცოტათი გაგვიმართლა.” – განაცხადა “სიტის” მარჯვენა მცველმა, პაბლო საბალეტამ.
“ორივე გუნდი ერთი სტილის ფეხბურთს თამაშობს, ორივე გუნდს შეტევაზე აქვს აქცენტი გაკეთებული. ასე რომ, ნამდვილად გახსნილი თამაშები გველის. მთავარია გოლები არ გავუშვათ.
მადრიდელებს შეტევა უყვართ, თუმცა ამ დროს ისინი საკმაოდ დიდ სივრცეს ტოვებენ. “რომას” რამოდენიმე 100%-იანი შანსი ჰქონდა … მაგრამ ჩვენ საკმარისი ძალა გაგვაჩნია, რათა მადრიდელები შევაწუხოთ.” – დაამატა მან.
შეიძლება გამართლების ბრალია, თუმცა ფაქტია, რომ “რეალს” ჯერ შინ გოლი არ გაუშვია (ჩემპიონთა ლიგაზე). ამასთანავე სწორედ “რეალის” კარში განხორციელდა ყველაზე ცოტა, 93 დარტყმა. ამ მხრივ მეორე პოზიციაზე “ბაიერნია” (100 დარტყმა), “სიტი” – 109 , “ატლეტიკო” – 111.
ამ ყველაფერში კი უდიდესი ღვაწლი კეილორ ნავასს მიუძღვის, რომელმაც 78 დარტყმიდან, 91.3%-ის მოგერიება მოახერხა. მეოთხედფინალებამდე მას ჩემპიონთა ლიგაზე საერთოდ არ ჰქონდა გოლი გაშვებული.
მას შემდეგ, რაც კევინ დე ბრუინი საქმეში დაბრუნდა, “სიტის” შეტევითმა მხარემ სრული ტრანსფორმაცია განიცადა. მან გასაოცარი ურთიერთობა დაამყარა სერხიო აგუეროსთან და ამ ორმა სწრაფმა ფეხბურთელმა სწრაფი კონტრ-იერიშების უდიდესი ძალა შექმნა.
მიმდინარე სეზონში ამ ორმა ფეხბურთელმა 33 გოლი გაიტანა, გამოიმუშავა 11 ასისტი და შექმნა 118 შანსი პრემიერ ლიგაში და ჩემპიონთა ლიგაში ერთად. ლაზარეთიდან დაბრუნების შემდეგ დე ბრუინმა 3 გოლის გატანა მოახერხა (მათ შორის ორი “პარის სენ-ჟერმენის” კარში გაიტანა) და ერთი ასისტიც ჩაიწერა აქტივში.
შეიძლება “რეალი” შინ კარგად გამოიყურებოდეს, თუმცა გასვლაზე ზიდანის შეგირდებს ძალიან უჭირთ. გავიხსენოთ პარიზში ფრედ დასრულებული მატჩი, “შახტართან” 4-3 და “ვოლფსბურგთან” გერმანიაში განცდილი მარცხი. რაც ინგლისელებს იმედს აძლევთ.
აგუეროსა და დე ბრუინის მსგავსად ფორმაში იმყოფება კრიშტიანო რონალდუც. დასვენებული პორტუგალიელი აუცილებლად ეცდება თავისივე რეკორდის დამხობას და ჩემპიონთა ლიგაზე კიდევ რამოდენიმე გოლის გატანას.
“სიტიმ” ჩემპიონთა ლიგის წლევანდელ სეზონში 18 გოლის გატნა შესძლო, რონალდუმ – 16-ის.
რონალდუმ, ბენზემამ და ბეილმა წლევანდელ სეზონში ერთად 92 გოლის გატანა შეძლეს.
მართალია “სიტის” დაცვა “პარის სენ-ჟერმენთან” განმეორებით მატჩში კარგად გამოიყურებოდა, თუმცა BBC-ს შეჩერება ადვილი ნამდვილად არ იქნება.
“სიტის” “ატლეტი” რომ მოხვედროდა ეს ბევრ გულშემატკივარს გაახარებდა. დიეგო სიმეონეს გუნდმა მხოლოდ 14 გოლის გატანა შესძლო (“სიტიზე” ნაკლების), არადა 2-ჯერ მოუწია ყაზახურ “ასტანასთან” თამაში (ერთი უგოლო ფრედ დასრულდა).
მადრიდელებმა ძალიან ცუდი თამაში აჩვენს “პსვ-სთანაც” – 180 წუთის განმავლობაში ერთი გოლიც ვერ გაიტანეს და საქმე პენალტების სერიამდე მიიყვანეს.
გარდა ამისა, “ატლეტიკოს” არც BBC ჰყავს, არც ლევანდოვსკი, არც დუგლას კოშტა, არც მიულერი და არც კუმანი. ისინი მხოლოდ ანტონი გრიზმანის, კარასკოსა და ტორესის იმედზე არიან.
თუმცა, ორმატჩიანი დაპირისპირების დროს ამ ყველაფერს აზრი ეკარგება. რაც ჩოლოს გუნდმა “ბარსასთანაც” დაამტკიცა. თუ მესიმ, ნეიმარმა და სუარესმა ვერ მოახერხეს “როხიბლანკოს” გატეხვა, მაშინ რას გახდებოდა “სიტი”?
დაცვითი კუთხით სიმეონეს გუნდი ევროპაში საუკეთესოა, უბადლო.
“ბაიერნი” თავისუფლად შეიძლება გამოვარდნილიყო 1/16-ფინალური ეტაპიდან. 2-0 “იუვენტუსის” წინააღმდეგ ნამდვილი კატასტროფის ტოლფასი უნდა ყოფილიყო ნებისმიერი გუნდისთვის, თუმცა არა “ბაიერნისთვის” – “ალიანც არენაზე” პეპის ბიჭებმა სასწაული მოახდინეს.
