“არსენალმა” დაძაბულ ბრძოლაში “ნიუკასლის” დამარცხება შეძლო (ვიდეო)

პრემიერ ლიგის 2019/20 წლების სეზონის გახსნითი ტურის კვირა დღე “ნიუკასლისა” და “არსენალის” დაპირისპირებამ გახსნა. პარალელურად მიმდინარეობდა “ლესტერ სიტისა” და “ვულვერჰემპტონის” შეხვედრაც, რომელიც ფრედ, 0:0 დასრულდა.

რაც შეეხება უშუალოდ “კაჭკაჭებისა” და “მეთოფეების” დაპირისპირებას, შეხვედრა გარდამავალი უპირატესობით მიმდინარეობდა. ორივე გუნდი მაქსიმალურად ცდილობდა მეტოქის კარის აღებას, თუმცა პირველ ტაიმში ეს ვერცერთმა ვერ შეძლო.

შეხვედრის მეორე ნახევარში უნაი ემერის გუნდის უპირატესობა კიდევ უფრო გამოიკვეთა, რაშიც წვლილი პირველ რიგში პიერ-ემერიკ ობამეიანგს მიუძღვის, რომელმაც საჯარიმოში ბრწყინვალედ დაამუშავა ბურთი და 58-ე წუთზე შეხვედრის ერთადერთი გოლიც გაიტანა.

ასე რომ, ფავორიტების მსგავსად თავისი შეხვედრა მოიგო “არსენალმაც” და ამ ეტაპზე სატურნირო ცხრილის მეექვსე პოზიციას ისაკუთრებს. მომდევნო ტურში “მეთოფეები” “ბარნლის” მიიღბენ, “კაჭკაჭები” კი “ნორვიჩს” ეწვევიან.