ათი ფაქტი ჰოლანდზე: რონალდუს დიეტიდან სალაჰის აღნიშვნამდე
მიმდინარე სეზონის მთავარ აღმოჩენად თამამად შეგვიძლიე ერლინგ ჰოლანდი მოვნათლოთ, რომელსაც ჩემპიონთა ლიგის 2019/20 წლების გათამაშებაში უკვე ათი გოლი დაუგროვდა. გთავაზობთ ათ საინტერესო ფაქტს 19 წლის ნორვეგიელ ვარსკვლავბიჭუნაზე.
შესაძლოა, ინგლისის ნაკრებში ეთამაშა
ერლინგ ჰოლანდის მამა, ალფ-ინგი, “ლიდს იუნაიტედის” ღირსებას იცავდა მაშინ, როდესაც დედამისი ფეხმძიმედ იყო. შესაბამისად, “ბორუსიას” ახალწვეულს შეეძლო “სამი ლომის” მაისურის მორგებისთვის ებრძოლა, თუმცა არჩევანი ნორვეგიის ნაკრებზე გააკეთა. მისი სანაკრებო დებიუტი 2019 წლის 5 სექტემბერს შედგა.
როგორც მამა, როგორც დედა…
ჰოლანდის მამა, როგორც უკვე აღვნიშნეთ, პროფესიონალი ფეხბურთელი იყო. დედამისი კი ნორვეგიის ჩემპიონია ჰეპტატლონში.
ერლინგი მსოფლიო რეკორდსმენია
ერლინგ ჰოლანდი მსოფლიო რეკორდის მფლობელიც გახლავთ – ხუთწლამდელთა შორის ადგილიდან ხტომაში მას საუკეთესო შედეგი აქვს დაფიქსირებული. 2006 წელს ის 1.63 მეტრზე ახტა.
Erling Braut Haaland still holds the world record for the longest standing long jump for 5 year olds. Haaland jumped 1.63m on 22 jan 2006. https://t.co/9h5cYtx8dW pic.twitter.com/dj8spKkEEE
— André Noruega (@AndreOstgaard) February 19, 2020
ერლინგის დებიუტი გარემარბის პოზიციაზე შედგა
შესაძლოა, ერლინგი ამ დროისთვის მსოფლიოს ერთ-ერთ ყველაზე საშიშ ცენტრფორვარდად მიგვაჩნდეს, თუმცა 15 წლის ასაკში, როდესაც მისი დებიუტი შედგა, ნორვეგიელი მარცხენა ფრთიდან უტევდა.
“ჰოფენჰაიმმა” დაიწუნა
2016 წელს ერლინგ ჰოლანდი ერთკვირიან სინჯებზე იმყოფებოდა “ჰოფენჰაიმში”. მაგრამ ტრანსფერი არ შედგა – გერმანულ კლუბს თვალსი ახალგაზრდა ფეხბურთელის მაღალი ხელფასი არ მოხვდა (5 000 ევრო თვეში).
2018 წელს “იუვე” აკვირდებოდა
Goal.Com-ის ცნობით ერლინგის ნიჭი “იუვენტუსმა” ჯერ კიდევ 2018 წელს შეამჩნია. მაშინ “ბებერი ქალბატონი” ფეხბურთელის დამატებაზეც ფიქრობდა, თუმცა გარკვეული მიზეზების გამო უკან დაიხია.
გამოსასყიდი თანხა
გერმანული წყაროების ინფორმაციით ჰოლანდის გამოსასყიდი თანხა 2021 წლის ზაფხულის შემდეგ სულ რაღაც 75 მილიონი ევრო იქნება.
აღნიშნავს როგორც სალაჰი
“ლივერპულის” ლიდერ მოჰამედ სალაჰისა და ანტუან გრიზმანის პოპულარული გოლის აღნიშვნის სტილი ჰოლანდმა ინათხოვრა. სწორედ ასე აღნიშნა ამ უკანასკენლმა “პსჟ”-ს წინააღმდეგ გატანილი გოლიც.
რონალდუს დიეტა
ერლინგის მამამ პრესასთან საუბრისას აღიარა, რომ პატრის ევრას ინტერვიუს წაკითხვის შემდეგ (რონალდუს სახლში სტუმრობაზე) “ზალცბურგის” ყოფილი ლიდერი რონალდუს მკაცრი დიეტის ერთგული მიმდევარი გახდა.
ერლინგის კუმირი
ნორვეგიელი ვარსკვლავბიჭუნა არ მალავს, რომ მისი ინსპირაციის წყარო ზლატან იბრაჰიმოვიჩია – “ის ძალიან მომწონს, მისი თამაშის სტილითა და მენტალიტეტით მოხიბლული ვარ. ის სკანდინავიელია და ვინმე უნდა გახდეს მისი მემკვიდრე!”
ბონუსი: ერლინგის საყვარელი მუსიკა ჩემპიონთა ლიგის ჰიმნი გახლავთ.
