აზარი: “კონტე, ტაქტიკის თვალსაზრისით, უფრო მეტს გვამუშავებს, ვიდრე ამას მოურინიო აკეთებდა”
ლონდონის “ჩელსის” ფეხბურთელმა, ედენ აზარმა Sky Sports-თან ინტერვიუში ერთმანეთს მისი ყოფილი და ახლანდელი მწვრთნელები, ჟოზე მოურინიო და ანტონიო კონტე შეადარა.
“შეიძლება ბევრს გაუკვირდეს, თუმცა ანტონიო უფრო მეტს გვამუშავებს ტაქტიკის კუთხით, ვიდრე ამას შარშან და შარშანწინ ჟოზე აკეთებდა.”
“წელს ძალიან ბევრს ვმუშაობთ პოზიციურ თამაშზე. ვიცით, სხვადასხვა სიტუაციაში სად უნდა იყოს თითოეული ფეხბურთელი: როგორც შემტევები, ასევე მცველები.”
“მოურინიოს დროს, ტაქიკურად ბევრს არ ვვარჯიშობდით. იყო რაღაც სისტემა, თუმცა ამაზე განსაკუთრებული ყურადღება არ მახვილდებოდა. ახლა მექანიზმი სულ სხვაა.”
“მაგალითად, იმ წელს, როცა მოურინიომ პრემიერ ლიგა მოგვაგებინა, მარცხენა ფრთაზე ჩემ უკან ნემანია მატიჩი იდგა. ხშირად ვრჩებოდი ხოლმე შეტევაში და მატიჩს დიდი დაცვითი საქმის გაკეთება უხდებოდა. ახლა ამ მხრივ სიტუაცია შეიცვალა.”
“ახლა მე უფრო სიღრმეში ვარ შეწეული. ჩემ უკან მარკოს ალონსო დგას, რომელიც ფლანგს ამაგრებს. შემიძლია, უპრობლემოდ დავრჩე წინ მეტოქის შეტევის დროს და, თუ კონტრ-შეტევას დავიწყებთ, ბურთს დაველოდო,” – აცხადებს აზარი.
