ბაჩო არაბული: “ეროვნულ ლიგაში ჩვენი მთავარი კონკურენტი “სამტრედიაა”
გუშინ ეროვნული ლიგის მეცამეტე ტურში თბილისის “დინამომ” სამტრედიის “სამტრედია” მიიღო. დედაქალაქელები თავიდან ორბურთიანი უპირატესობით გავიდნენ წინ, შემდეგ იმერლებმა გაათანაბრეს. თუმცა, ბოლო წუთზე ბაჩანა არაბულის თავურით “დინამომ” მაინც მოიპოვა სამი ქულა.
Fanebi.Com-ი გამარჯვების გოლის ავტორს დაუკავშირდა და მას კომენტარის გაკეთება სთხოვა.
“ეროვნული ლიგის ერთ-ერთ საუკეთესო გუნდს ვეთამაშეთ, რაც უშუალოდ მატჩზეც აისახა – ძალიან სანახაობრივი და კარგი დაპირისპირება გამოვიდა. შეხვედრა მშვენივრად დავიწყეთ, ორი გოლიც გავიტანეთ, თუმცა შემდეგ ცუდი რამ დაგვემართა. ჩვენი უყურადღებობის და სამტრედიის მიერ ზეწოლის გაძლიერების გამო, ორი გოლი მივიღეთ.”
“სტუმრების ორ გოლამდე და მათ შემდეგ, ორივე შემთხვევაში გვქონდა მომენტები. საბოლოოდ, მაინც ჩვენ გაგვიმართლა.”
“ჩემპიონატში მთავარ კონკურენტად სწორედ “სამტრედიას” მივიჩნევ. თუმცა, კიდევ არის რამდენიმე გუნდი, რომლებსაც ხარისხიანი ფეხბურთის თამაში შეუძლიათ. ზაფხულისთვის უკეთ გამოიკვეთება, ვის ძალუძს ჩემპიონობისთვის რეალური ბრძოლა,” – განაცხადა არაბულმა.
ფოტო: Fcdinamo.Ge
