“ბარსელონა” იანვარში “ლივერპულის” ლიდერს დაიმატებს?

ესპანური პრესის ცნობით, “ლივერპულის” ნახევარმცველი ფილიპე კოუტინიო იანვარში “ბარსელონაში” გადავა.

სხვადასხვა წყაროების თანახმად, კატალონიური გუნდი ბრაზილიელი ფეხბურთელის სანაცვლოდ 22.25 მილიოინ ფუნტ სტერლინგს ამზადებს. ესპანური გაზეთი “სპორტი” წერს, რომ კოუტინიო მოხარული იქნება “ბარსელონაში” გადასვლით. გავრცელებული ინფორმაციით, კატალონიელებმა 23 წლის ნახევარმცველთან სიტყვიერ შეთანხმებას უკვე მიაღწიეს.

შეგახსენებთ, რომ ფილიპე კოუტინიო “ლივერპულში” მილანის “ინტერიდან” 2013 წლის იანვარში 8.5 მილიონი ფუნტ სტერლინგის სანაცვლოდ გადავიდა. ბრაზილიელი ფეხბურთელის ტრანსფერის შესახებ სპეკულირება მას შემდეგ უფრო გააქტიურდა, რაც სტივენ ჯერარდის ახალი ავტობიოგრაფიული წიგნი “ჩემი ამბავი” გამოიცა. ჯერარდი ვარაუდს გამოთქვამს, რომ ერთ დღეს კოუტინიო მადრიდის “რეალს” ან “ბარსელონას” შეუერთდება.