“ბარსელონამ” “მანჩესტერ იუნაიტედი” უპრობლემოდ დაამარცხა (ვიდეო)

უეფას ჩემპიონთა ლიგის მიმდინარე გათამაშების მეოთხედფინალურ ეტაპზე “ბარსელონასა” და “მანჩესტერ იუნაიტედს” შორის საპასუხო მატჩი გაიმართა. როგორც მოგეხსენებათ, წყვილის პირველი შეხვედრა “ოლდ ტრაფორდზე” კატალონიელთა გამარჯვებით ანგარიშით 1:0 დასრულდა. განმეორებითი მატჩი “ბლაუგრანას” სათამაშო უპირატესობით წარიმართა და მისივე გამარჯვებით, ანგარიშით 3:0 დასრულდა.

“მანჩესტერ იუნაიტედს” ორმატჩიან დაპირისპირებაში წონასწორობის აღდგენა პირველივე წუთზე შეეძლო, როდესაც მარკუს რაშფორდი მეკარესთან ერთი ერთზე გავიდა, თუმცა ბურთი ხარიხას გაარტყა. შემდეგ ინიციატივა საკუთარ თავზე ლიონელ მესიმ აიღო, რომელმაც ოთხი წუთის განმავლობაში დუბლი გაიფორმა. თუ პირველი გოლი არგენტინელის სრული დამსახურება იყო, მეორე ბურთი დავიდ დე ხეას უხეში შეცდომის შედეგად გავიდა. 61-ე წუთზე ფილიპე კოუტინიომ ანგარიში გამანადგურებელი გახადა და ინგლისელებს იმედი საბოლოოდ გადაუწურა.

ამრიგად, “ბარსელონამ” “მანჩესტერ იუნაიტედი” ორი მატჩის ჯამში ანგარიშით 4:0 დაამარცხა და 2015 წლის შემდეგ ჩემპიონთა ლიგის ნახევარფინალურ ეტაპზე პირველად გავიდა. კატალონიელები მომდევნო რაუნდზე “ლივერპულისა” და “პორტუს” წყვილში გამარჯვებულს შეხვდებიან.

ჩემპიონთა ლიგა
მეოთხედფინალი (II მატჩი)
“ბარსელონა” — “მანჩესტერ იუნაიტედი” 3:0 (2:0) (ორი მატჩის ჯამში 4:0)
გოლები: მესი 16′, 20′, კოუტინიო 61′.