ბერგამოს მერი: “ატალანტა” – “ვალენსიას” მატჩი ბიოლოგიური ბომბი იყო”
ქალაქ ბერგამოს მერმა ჯორჯო გორიმ განაცხადა, რომ იტალიაში ვირუსის გავრცელების ერთ-ერთი წყარო ჩემპიონთა ლიგაზე გამართული “ატალანტა” – “ვალენსიას” მატჩი იყო.
როგორც იცით, ჩემპიონთა ლიგის მერვედფინალური ეტაპის პირველ შეხვედრაში “ატალანტამ” “ვალენსიას” მილანში, “სან სიროზე” უმასპინძლა და მეტოქე 4:1 დაამარცხა.
“ეს მატჩი ბიოლოგიური ბომბი იყო. მაშინ არ ვიცოდით, რა ხდებოდა. იტალიაში პირველი პაციენტი 23 თებერვალს გვყავდა. თუ მაშინ ვირუსი უკვე გავრცელების ფაზაში იყო, გამოდის, რომ “სან სიროზე” მყოფი 40000 ფანი დაინფიცირდა”, – ციტირებს გორის სიტყვებს “მარკა”.
შეგახსენებთ, რომ “ვალენსიას” რამდენიმე ფეხბურთელს, მათ შორის ეზეკიელ გარაის, ხოსე გაიასა და ელიაკიმ მანგალას კორონავირუსი დაუდასტურდათ. ასევე, ვალენსიელი ჟურნალისტი ენრიკე მატეუ, რომელიც მილანში გამართულ მატჩს ესწრებოდა, კორონავირუსით დაინფიცირდა.
ამავდროულად, ცნობილია, რომ “ატალანტას” მეკარე მარკო სპორტიელოს კორონავირუსი აქვს.
