ბონუჩი მუნდიალის შესარჩევი ეტაპის სისტემას აკრიტიკებს: “ყველაფერი ერთ მატჩში დავკარგეთ”
იტალიის ნაკრების მცველმა ლეონარდო ბონუჩიმ მსოფლიოს ჩემპიონატის საკვალიფიკაციო ეტაპის სისტემა გააკრიტიკა.
“ყველაფერი ერთ მატჩში დავკარგეთ, ეს აბსურდული სისტემაა. სამწუხაროდ, ასეთია სიტუაცია, ეს სიგიჟეა. ერთ კონკრეტულ შეხვედრაში ნებისმიერი რამის მოხდენაა შესაძლებელი. არიან გუნდები, რომლებიც ოთხ-ხუთ მატჩში დამარცხდნენ და შესარჩევი ეტაპი მაინც დაძლიეს, ჩვენ კი ერთი შეხვედრით გამოვარდით.
ტურნირის რეგულაცია, რა თქმა უნდა, ალიბი და საბაბი არ არის. უკეთესად უნდა გამოვსულიყავით. მოტივაცია უნდა ვიპოვოთ, რათა უწინდელ დონეს დავუბრუნდეთ”, – ბონუჩის სიტყვებს Goal-ი აქვეყნებს.
შეგახსენებთ, რომ მსოფლიოს ჩემპიონატის საკვალიფიკაციო ეტაპის საპლეიოფო რაუნდის ნახევარფინალში იტალიის ეროვნული გუნდი შინ ჩრდილოეთ მაკედონიის ნაკრებთან დამარცხდა (0:1), რის გამოც მუნდიალის ფინალურ სტადიას ზედიზედ მეორედ გამოტოვებს.
