ბორჯღალოსნები სამშობლოში მიღწეული მიზნით დაბრუნდნენ
7 ოქტომბერს ნამიბიასთან გამართული დასკვნითი მატჩით ბორჯღალოსნებმა 2015 წლის მსოფლიო თასზე ასპარეზობა დაასრულეს, 2 გამარჯვება მოიპოვეს, ‘გ’ ჯგუფში მესამე ადგილი დაიკავეს და 2019 წელს იაპონიაში გასამართი მსოფლიოს თასის საგზური თითქმის გაინაღდეს.
9 ოქტომბერს, გამთენიისას ნაკრები თბილისის საერთაშორისო აეროპორტში დაფრინდა. გამარჯვებულ გუნდს გულშემატკივრები საპატიო კორიდორითა და საქომაგო ატრიბუტიკით დახვდნენ. ქომაგებს შორის იყვნენ საქართველოს სპორტისა და ახალგაზრდობის საქმეთა სამინისტროს წარმომადგენლებიც, რომლებიც ბიჭებს პირველები შეეგებდნენ და სამახსოვრო ფოტოები გადაიღეს.
ბორჯღალოსნების რამდენიმე წევრი ინგლისიდან პირდაპირ საფრანგეთში გაფრინდა და საკუთარ კლუბებს დაუბრუნდა. ნაკრების სხვა მოთამაშეები, მწვრთნელები, მენეჯერები, ექიმები და გუნდის სხვა წევრები კი უკვე დედაქალაქში არიან. ინგლისში მსოფლიოს თასის დასრულებამდე დარჩება რაგბის კავშირის პრეზიდენტი გიორგი ნიჟარაძეც, რომელიც საერთაშორისო ფედერაციის ხელმძღვანელობასთან და სხვა ქვეყნების რაგბის კავშირის პრეზიდენტებთან საქმიან შეხვედრებს გამართავს.
შეგახსენებთ, რომ მიმდინარე მსოფლიო თასის გათამაშებაში მილტონ ჰეიგის გუნდმა 19 სექტემბერს ტონგა 17:10 დაამარცხა, 25 სექტემბერს არგენტინასთან 9:54 დათმო, 2 ოქტომბერს კი ახალ ზელანდიასთან 10:43 ღირსეულად დამარცხდა. 7 ოქტომბერს გადამწყვეტი შეხვედრა ნამიბიასთან გამართა და 17:16 გაიმარჯვა. დღეს ‘გ’ ჯგუფის მორიგ მატჩში ბორჯღალოსნების მეტოქეები ახალი ზელანდია და ტონგა დაუპირისპირდებიან ერთმანეთს. თუ ‘ოლ ბლექსი’ ჯგუფის ფინალურ მატჩშიც იმარჯვებს ბორჯღალოსნები დაკავებულ ადგილს შეინარჩუნებენ და მომავალ მსოფლიო თასზე შესარჩევის გარეშე გავლენ.
Rugby.GE
